Fréttamenn Ríkisútvarpsins eru tilnefndir til fernra blaðamannaverðlauna í þremur flokkum fyrir umfjöllunarefni ársins 2020. Þar á eftir koma fréttamenn fréttastofu Stöðvar 2, Vísis og Bylgjunnar en þeir hljóta þrjár tilnefningar í þremur flokkum. Stundin er tilnefnd til tveggja blaðamannaverðlauna í tveimur flokkum. Morgunblaðið, DV og Kjarninn hljóta eina tilnefningu hver fjölmiðill.

Hlédís Maren Guðmundsdóttir, blaðamaður Stundarinnar, er tilnefnd til verðlauna fyrir viðtal ársins. Viðtal Hlédísar var við fjórar ungar íslenskar konur sem eiga rætur sínar að rekja til Asíu. Í viðtalinu lýstu þær kynferðislegum kynþáttafordómum sem þær hafa orðið fyrir, allt frá því þær voru á grunnskólaaldri.

Freyr Rögnvaldsson og Bjartmar Oddur Þeyr Alexandersson, blaðamenn Stundarinnar, hljóta tilnefningu til verðlauna í flokki rannsóknarblaðamennsku ársins. Tilnefninguna hljóta þeir fyrir fréttaflutning af plastmengun í Krýsuvík vegna dreifingar umhverfisfyrirtækisins Terra á moltu þar á svæðinu. Terra var valið umhverfisfyrirtæki ársins árið 2020.

Blaðamannafélag Íslands veitir árlega blaðamannaverðlaun í fjórum flokkum, umfjöllun ársins, viðtal ársins, rannsóknarblaðamennsku ársins og blaðamannaverðlaun ársins. Frá stofnun Stundarinnar árið 2015 hafa blaðamenn hennar verið tilnefndir fimmtán sinnum til blaðamannaverðlaunanna. Fimm sinnum hafa blaðamannaverðalunin fallið blaðamönnum Stundarinnar í skaut. Blaðamannaverðalaunin fyrir árið 2020 verða veitt næstkomandi föstudag, 26. mars.

Hér má sjá tilnefningarnar í heild sinni:

Umfjöllun ársins

• Birta Björnsdóttir og Guðmundur Björn Þorbjörnsson, RÚV.  Fyrir fjölbreytta, aðgengilega og upplýsandi umfjöllun af erlendum vettvangi sem vakið hefur athygli í þáttunum Heimskviðum.
• Erla Björg Gunnarsdóttir og Nadine Guðrún Yaghi, Fréttastofa Stöðvar 2, Vísis og Bylgjunnar. Fyrir áhrifamikla og afhjúpandi umfjöllun Kompáss um dulinn vanda kvenna með þroskahömlun sem leiðst hafa út í vændi.
• Sunna Ósk Logadóttir, Bára Huld Beck, Þórður Snær Júlíusson, Arnar Þór Ingólfsson og Jónas Atli Gunnarsson, Kjarnanum.  Fyrir vandaða og yfirgripsmikla umfjöllun um eldsvoðann á Bræðraborgarstíg 1 og margháttaðar afleiðingar hans.

Viðtal ársins

• Erla Hlynsdóttir, DV.  Fyrir áhrifamikið viðtal við Elísabetu Ronaldsdóttur þar sem lýst er alvarlegu ofbeldi í nánu sambandi.
• Hlédís Maren Guðmundsdóttir, Stundinni. Fyrir viðtal við fjórar ungar íslenskar konur sem eiga rætur að rekja til Asíu og lýsa kynferðislegum kynþáttafordómum í sinn garð allt frá grunnskólaaldri. 
• Orri Páll Ormarsson, Morgunblaðinu. Fyrir viðtal við Ingva Hrafn Jónsson þar sem hann ræðir um andlát bróður síns og þá ákvörðun hans að þiggja dánaraðstoð.

Rannsóknarblaðamennska ársins

• Aðalsteinn Kjartansson, Helgi Seljan og Stefán Drengsson, RÚV. Fyrir fréttaskýringarþátt um afdrif tveggja gámaflutningaskipa sem Eimskip seldi í gegnum millilið til niðurrifs í Indlandi þvert á evrópsk lög.
• Freyr Rögnvaldsson og Bjartmar Oddur Þeyr Alexandersson, Stundinni. Fyrir fréttaflutning um plastmengun í Krýsuvík vegna moltudreifingar umhverfisfyrirtækisins Terra sem Samtök atvinnulífsins valdi umhverfisfyrirtæki ársins 2020. 
• Nadine Guðrún Yaghi, Fréttastofa Stöðvar 2, Vísis og Bylgjunnar. Fyrir að afhjúpa umfangsmikil og afdrifarík mistök sem gerð voru við greiningar á leghálssýnum hjá Leitarstöð Krabbameinsfélagsins. 

Blaðamannaverðlaun ársins

• Hólmfríður Dagný Friðjónsdóttir, RÚV.  Fyrir umfjöllun um atvinnuleysi þar sem tekið var á sálrænum, félagslegum og fjárhagslegum afleiðingum þess í skugga heimsfaraldurs COVID-19. 
• Sunna Karen Sigurþórsdóttir, Fréttastofa Stöðvar 2, Vísis og Bylgjunnar. Fyrir yfirgripsmiklar og áhrifaríkar fréttir sem fluttar voru beint af vettvangi af aurskriðunum á Seyðisfirði og afleiðingum þeirra. 
• Þórhildur Þorkelsdóttir, RÚV. Fyrir vönduð fréttatengd viðtöl þar sem sjónum er beint að einstaklingum í erfiðum aðstæðum.

Fyrirvari: Hér er fjallað um mál er varða Stundina með beinum hætti.