Sigríður Á. Andersen, þingkona Sjálfstæðisflokksins og fyrrverandi ráðherra, vill að ríkið losi sig undan eignarhaldi á Íslandsbanka í heild sinni og það sem fyrst. Í stað þess að selja bankann vill hún að almenningi öllum á Íslandi verði gefinn jafn hluti í bankanum.

Sigríður lýsir þessari skoðun sinni í aðsendri grein í Morgunblaðinu í dag. Þar segir hún að kominn sé tími til að hrinda í framkvæmd áratugagamalli hugmynd. „Að ríkið afhendi landsmönnum öllum jafnan hlut í bönkunum til eignar,“ skrifar Sigríður. Ekki sé til betri leið til að að dreifa eignarhaldi, eins og margir telji mikilvægt og „enginn verður sakaður um að afhenda hlutina „útvöldum““.

„Enginn verður sakaður um að afhenda hlutina „útvöldum““

Sigríður rekur hugmyndina einkum til Eykons, Eyjólfs Konráðs Jónssonar, fyrrverandi ritstjóra Morgunblaðsins og þingmanns Sjálfstæðisflokksins á áttunda til tíunda áratugar síðustu aldar. Hann hafi hvatt mjög til þátttöku almennings í atvinnulífinu í gegnum hlutafélög.

Til stendur, skrifar Sigríður, að fara í hlutafjárútboð á 25 prósentum af hlutum í Íslandsbanka. Það sé vitaskuld gert til að lækka skuldir ríkissjóðs og einnig að minnka áhættu af eignarhaldi ríkisins á svo stórum eignarhlutum í fjármálafyrirtækjum sem Landsbankinn og Íslandsbanki eru. Önnur yfirlýst markmið séu að fjölga fjárfestingamöguleikum fyrir einstaklinga og fagjárfesta og stuðla að dreifðu, fjölbreytu og heilbrigðu eignarhaldi.

Ekki sé til betri leið til þess að ná þessum markmiðum, skrifar Sigríður, heldur en að afhenda landsmönnum öllum jafnan hlut í bönkunum til eignar. Efnahags- og viðskiptanefnd hafi nú til umsagnar fyrirætlan fjármálaráðherra um hlutafjárútboðið. „Ég hvet nefndina til að taka af mér ómakið og leggja fram frumvarp til laga um afhendingu drjúgs hluta í Íslandsbanka til landsmanna á árinu samhliða fyrirhuguðu hlutafjárútboði.“