„Enginn forseti á síðari tímum hefur sætt öðru eins einelti og Trump sætti í sinni tíð,“ segir í leiðara Morgunblaðsins í dag. 

Leiðarar blaðsins eru ómerktir, en taldir skrifaðir af Davíð Oddssyni, ritstjóra og fyrrverandi forsætisráðherra Íslands, en annar ritstjóri er Haraldur Johanesen. Ritstjórnarskrif Morgunblaðsins hafa vakið töluverða umræðu og eftirtekt vegna stuðnings við málstað Donalds Trump Bandaríkjaforseta.

Fjallað er um innrás stuðningsmanna Trumps inn í þinghúsið í Washington á forsíðu Morgunblaðsins í dag, líkt og flestra vestrænna fjölmiðla, en leiðarinn undir heitinu „Að loknum stóraslag“ tekur enga afstöðu með eða á móti innrásinni. Þar er hins vegar gert lítið úr Joe Biden, verðandi forseta og bent á að Trump njóti aðdáunar.

„En Trump átti við Joe Biden, sem er varla umdeilt að gengur „ekki á öllum,“ og var því geymdur í kjallaranum ásamt öðru því sem passaði ekki í stássstofurnar uppi. Það er ekki góð einkunn fyrir Trump að hafa ekki ráðið við það. En hans menn geta bent á að enginn forseti á síðari tímum hefur sætt öðru eins einelti og Trump sætti í sinni tíð. Nær allt kjörtímabilið var sveit sérstaks saksóknara með tugi saksóknara og rannsakenda að fara yfir ásakanir um að Rússar hefðu séð til að Trump ynni kosningarnar 2016. Allir helstu fjölmiðlar Bandaríkjanna fylgdu þessari dellu eftir eins og þeir vissu sjálfir ekkert í sinn haus. Það var einnig eftirtektarvert að evrópskir fjölmiðlar töldu allan þennan tíma að þarna væri verið að fjalla um alvöru mál, og það jafnvel risavaxið mál og urðu því sér til minnkunar eins og starfssystkinin vestra.“

Þá segir Morgunblaðið um Biden að „aldrei í sögu Bandaríkjanna hefur veikari forseti komið nýr í Hvíta húsið.“

Þess ber að geta að Joe Biden hlaut 51,3% atkvæða í forsetakosningunum í nóvember en Trump 46,9%. Sigur Bidens var meira afgerandi en í síðustu tveimur forsetakosningum, þar sem Trump hlaut aðeins 46,1% atkvæða 2016 og Obama 51,1% atkvæða 2012.

Hins vegar er bent á í leiðara Morgunblaðsins að Trump sé dáðasti maður Bandaríkjanna, en hann hlaut 18% stuðning í samsvarandi skoðanakönnun Gallups, þremur prósentustigum meira en Barack Obama. „En það hefur sjálfsagt orðið huggunarríkt fyrir Trump í harmi hans að Gallup birti niðurstöður könnunar sinnar í gær sem sýndi að hann, Donald Trump, væri á þessari stundu dáðasti maður Bandaríkjanna. Obama kom næstur á eftir Trump og sá þriðji í kjallara þessarar mælingar var nýkjörni forsetinn, Joe Biden. Sko hann.“

Þrátt fyrir að mælast með aðdáun 18% Bandaríkjamanna er Donald Trump óvinsælasti forseti undir lok forsetatíðar sinnar síðustu fjóra áratugi.

Áður hefur leiðaraskrifari Morgunblaðið meðal annars stutt ásakanir Donalds Trumps um mögulegt kosningasvindl í forsetakosningunum, þar sem gagnrýnt var 20. nóvember að gert væri ráð fyrir því að Trump hefði tapað kosningunum sem fóru fram 17 dögum áður. 

Ekki er minnst á innrás stuðningsmanna Trumps í þinghúsið í leiðaranum og ekki hægt að fullyrða að leiðarahöfundurinn hafi vitað af atburðinum þegar hann skilaði grein sinni í prentun.