Þorbjörn Þórðarson kom að gerð myndbands Samherja

Þorbjörn Þórð­ar­son, fyrr­ver­andi frétta­maður Stöðvar 2, kom að gerð mynd­bands Samherja þar sem því var haldið fram að Helgi Seljan, frétta­maður RÚV, hefði falsað gögn sem leitt hefðu til hús­leitar hjá Samherja og ára­langs mála­rekst­urs vegna gruns um gjald­eyr­is­brot fyr­ir­tæk­is­ins. Þetta stað­festa heim­ildir Stund­ar­innar.

Í mynd­band­inu er því haldið fram að Helgi hafi árið 2012 byggt umfjöllun sína um meint brot Samherja á gjald­eyr­is­lögum í Kast­ljósi á gögnum sem hafi verið röng, hann hafi ýmist breytt umræddum gögnum eða falsað þau. Í mynd­band­inu komu fram tveir aðilar sem starfa fyrir Samherja, en voru ekki kynntir sem slíkir, auk við­skipta­fé­laga for­stjóra fyr­ir­tæk­is­ins.

Verð­lags­stofa skipta­verðs stað­festi hins vegar í gær að gögnin sem Helgi studd­ist við væru til og hefðu verið unnin af starfs­manni. Þá hafa fleiri aðilar stað­fest opin­ber­lega að hafa fengið gögnin í hend­urnar, en þau voru merkt sem trún­að­ar­mál.

Þor­steinn Már Bald­vins­son, for­stjóri Samherja, sagði í þessu sam­hengi að Helgi hefði sagt þjóð­inni ósatt og brotið lög. „Það er nauð­syn­legt að almenn­ingur viti hvernig trún­að­ar­maður fólks­ins, frétta­maður á Rík­is­út­varp­inu, fer með heim­ildir, breytir þeim og hag­ræðir og lagar frétta­flutn­ing að eigin geð­þótta, þvert á lög,“ sagði hann í for­síðu­frétt Frétta­blaðs­ins um mynd­band Samherja.

Þor­steinn Már er einn af tutt­ugu stærstu hlut­höfum Sýnar, félags­ins sem rekur Stöð 2, Vísi og fleiri miðla.

Réðu fólk í krísustjórnun vegna uppljóstrana

Þorbjörn var feng­inn til ráð­gjafar Samherja síð­asta haust í kjöl­far upp­ljóstrana Stund­ar­innar, Kveiks, Wikileaks og Al Jazeera um mútu­greiðslur fyr­ir­tæk­is­ins til þess að kom­ast yfir hesta­makríl­skvóta í Namibíu. Helgi Seljan var meðal þeirra sem unnu þá umfjöllun fyrir Kveik, en hann hafði áður fjallað um meint gjald­eyr­is­brot Samherja fyrir Kastljós.

Þorbjörn er lög­fræði­mennt­aður og hlaut rétt­indi til mál­flutn­ings fyrir hér­aðs­dómi í fyrra. Hann var frétta­maður á Stöð 2 í um ára­tug og var til­nefndur til blaða­manna­verð­launa fyrir störf sín, en hætti hjá fjöl­miðl­inum í júlí í fyrra. Í kjöl­farið stofn­aði hann LPR lög­manns­stofu, ásamt Halldóri Reyni Hall­dórs­syni, sem sam­kvæmt heima­síðu sinnir lög­mennsku og almanna­tengslum. Á Þorbjörn 99 pró­senta hlut í félag­inu.

Samherji hefur leitað fanga víða til að sinna fjöl­miðlaum­fjöllun, krísu­stjórnun og innri rann­sókn vegna Namib­íu­starf­sem­innar. Í Noregi fékk fyr­ir­tækið Håkon Borud, með­eig­anda og ráð­gjafa hjá First House ráð­gjaf­ar­fyr­ir­tæk­inu, til starfa. Hann er fyrr­ver­andi frétta­stjóri Aften­posten með 25 ára reynslu sem blaða­maður og rit­stjóri í norskum fjöl­miðlum. Árið 2016 gekk hann til liðs við First House og er nú með­eig­andi. Þá leit­aði Samherji til norsku lög­fræði­stof­unnar Wikborg Rein til að sinna innri rann­sókn fyr­ir­tæk­is­ins á starf­sem­inni í Namibíu, sem kynnt var með til­kynn­ingu dag­inn áður en umfjöll­unin fór í loftið. Stofan er stærsta lög­fræði­stofa Noregs, með skrif­stofur í Osló og Bergen og erlendis í London, Singapúr og Sjanghæ. Rann­sókn­inni lauk í sumar, en Samherji hefur ekki viljað birta nið­ur­stöð­urnar opin­ber­lega.

Ekki náð­ist í Þorbjörn við vinnslu frétt­ar­innar.