Pillunotkun ungmenna: Bláa pillan

Í mynd­inni Fylki (e. Matrix) fer lífið fram í sýnd­ar­veru­leika sem er stjórnað af vélum. Til þess að brjót­ast úr sýnd­ar­heim­inum og berj­ast gegn skugga­meist­ur­unum þarf að taka rauða pillu, en ef þú vilt lifa áhyggju­laus án vit­neskju um að lífið þitt sé lygi getur þú tekið bláa pillu. Síðasti texti fjall­aði um þá sem vilja berj­ast gegn ríkj­andi kerfi, þá sér­stak­lega hægri-öfga­menn, en hvað með það fólk sem tekur bláu pill­una og spilar með kerf­inu?

Hvort sem það er trúin á rétt­látan heim (e. Just world fallacy), hrygg­leysi eða miðju­moð sem knýr leik­menn þá er klárt mál að það er best að spila með. Það er best að kjósa bjart­sýna Framsókn, mæta á grill­kvöld með hægri­körlum og ljóða­upp­lestur með vinstriliði. Sagan er ekki skrifuð af mik­il­mennum, heldur bók­mennta­fræð­ing­unum þeirra. Hættu að reyna að vera merki­leg mín kæra les­önd, sam­þykktu að fljóta í gegnum lífið sem and­ar­ungi í straum­þungri á.

[adspot]Ef yður hefur ein­hvern tím­ann liðið eins og að til­vistin ætti að snú­ast um meira en að snúa hamstra­hjólum atvinnu­lífs­ins þá er yður nær að líta í eigin barm. Mundu að Birt­ingur rækt­aði garð­inn sinn, ekki skóg! Finnst þér eins og að það sé eitt­hvað veru­lega skakkt í hvernig sam­fé­lagið er byggt upp? Þetta er lík­leg­ast bara eitt­hvað and­legt. Kulnun lík­leg­ast. Taktu kvöld­nám­skeið í ein­hverju sem þú hefur gaman að. Ekki ímynda þér hvernig barna­þræl myndi líða í Smára­lind­inni.

[links]Því nú þegar við erum komin á stoppi­stöð sög­unnar þá er ekki lengur þörf á öfga­fullum aðgerðum til þess að ná fram umbótum. Mótmæli hægja á umferð, öfgar í stjórn­málum drepa stemn­ing­una, gagn­rýnin hugsun á ekki heima ann­ars­staðar en í mark­aðs­grein­ingu og nú flokka flestir þannig að hnatt­hlýnun hlýtur að redd­ast. Treystum bara þeim sem stjórna til þess að redda þessu fyrir okkur. Við erum nefni­lega öll á sama báti, þrátt fyrir að ein­hverjir fái millj­arð á ári.

Hvor pillan er skárri? Sú sem dregur þig úr helli Platóns og sýnir þér plast­hafið í kringum hann eða pillan sem lamar þig? Hvora pill­una myndir þú taka? Hefur þú val? Lesandi ég verð að játa að ég á ekki efni á rauðu pill­unni, því þegar ég er orð­inn stór þá verða jökl­arnir horfnir og Reykja­vík sokkin undir sæ. Ég vil ekki þurfa að pæla í því, heldur vil ég huga að hnattreisu og hvaða raf­mynt ég mun fjár­festa í næst.

Kannski ætti maður samt að reyna að kasta upp bláu pill­unni ein­hvern tím­ann, áður en það er of seint.

Höf­undur er nemi.