Fleiri en einn af hverjum tíu sem fara í skimun í Hollandi greinast með COVID-19

Daði Freyr Pét­urs­son og Gagna­magnið eru fjarri góðu gamni í kvöld, eins og alþjóð veit, vegna kór­ónu­veirusmita sem komu upp í íslenska Eurovision-hópnum í vik­unni. Veiran náði alla leið inn í þann hóp sem hefði undir eðli­legum kring­um­stæðum átt að stíga á sviðið í Rott­er­dam í Hollandi og flytja lagið 10 Years, sem er fram­lag Íslands í ár.

Sem betur fer er upp­takan frá æfingu hóps­ins á dög­unum vel heppnuð og sam­kvæmt veð­bönkum lík­leg til þess að skila lag­inu ofar­lega á lista í kvöld, þó reyndar séu sumir búnir að afskrifa með öllu að Daði og Gagna­magnið standi uppi sem sig­ur­veg­arar í kvöld, eins og sagt var frá á Kjarn­anum fyrr í dag.[links]

Veiran sennilega á töluverðu flugi í Hollandi

Hins vegar þarf ef til vill þarf ekki að koma á óvart að smit láku inn í íslenska teymið, þrátt fyrir að það hafi reyndar verið bólu­sett áður en haldið var af stað.

Miðað við opin­bera töl­fræði frá Hollandi má ætla að veiran leiki nokkuð lausum hala í hol­lensku sam­fé­lagi, en þar í landi eru um þessar mundir um og yfir 12 pró­sent COVID-19 sýna að reyn­ast jákvæð, sem er eitt hæsta hlut­fallið í Evrópu.

[adspot]

Hol­lend­ingar virð­ast nefni­lega ekki verið að taka mikið af COVID-prófum til þess að hafa hemil á veirunni. Þrátt fyrir að hlut­fall jákvæðra sýna sé hátt í evr­ópskum sam­an­burði þessa dag­ana hefur það verið enn hærra, fyrr í far­aldr­inum.

Til sam­an­burðar hefur hlut­fall jákvæðra sýna úr ein­kenna­sýna­tökum hér á landi ekki farið yfir nema einu sinni yfir 3 pró­sent það sem af er þessu ári. Alþjóða­heil­brigð­is­mála­stofn­unin (WHO) gaf í maí í fyrra út kríteríu, þar sem sagði að hlut­fall jákvæðra sýna undir 5 pró­sent væri eitt merkja um að far­ald­ur­inn væri undir stjórn.

Þegar lítið er ski­mað fyrir COVID-19 er lík­legt að mörg til­felli upp­götv­ist alls ekki – og þegar hlut­fallið er jafn hátt og það er í Hollandi í dag er senni­lega ein­ungis verið að greina lít­inn hluta þeirra til­fella sem sann­ar­lega eru út í sam­fé­lag­inu. En þar, rétt eins og hér á landi, gengur ágæt­lega að bólu­setja almenn­ing og verið er að aflétta sótt­varna­ráð­stöf­unum í áföngum. Það að veiran sé á flugi er því ekki jafn mikið áhyggju­efni og áður.

Alls lögð­ust þó 239 manns inn á gjör­gæslu í Hollandi í síð­ustu viku vegna veirunnar og 90 manns lét­ust.

Stíft skimað í kringum keppnina

Það breyti því þó ekki að Eurovision­farar og aðrir sem eru á vett­vangi keppn­innar í Rott­er­dam þurfa að und­ir­gang­ast skimun á tveggja daga fresti. Samkvæmt því sem sagði í til­kynn­ingu á vef Eurovision-keppn­innar í fyrra­dag var alls búið að taka fleiri en 24.400 COVID-próf hjá starfs­fólki, sjálf­boða­liðum, Eurovision-förum og fjöl­miðla­fólki á rúmum mán­uði, eða allt frá því að und­ir­bún­ingur í Ahoy-höll­inni hófst 6. apríl.

Einungis 16 manns höfðu þá greinst með veiruna – eða 0,06 pró­sent af þeim sem höfðu verið skimuð. Þar af eru tveir úr íslenska teym­inu.