Benedikt Árnason leiðir nefnd um vísitölu neysluverðs

For­sæt­is­ráð­herra hefur skipað nefnd um aðferða­fræði við útreikn­ing vísi­tölu neyslu­verðs. Skipun nefnd­ar­innar er liður í sam­komu­lagi rík­is­stjórn­ar­innar og aðila vinnu­mark­að­ar­ins um að vinna mark­visst að því að draga úr vægi verð­trygg­ing­ar­innar. Benedikt Árnason, skrif­stofu­stjóri for­sæt­is­ráðu­neyt­is­ins, mun leiða nefnd­ina en hún á að ljúka störfum fyrir lok júní 2020.

Aðferðafræði við húsnæðislið vísitölunnar tekið til athugunar

Í stjórn­ar­sátt­mála rík­is­stjórn­ar­innar frá 30. nóv­em­ber 2017 segir að rík­is­stjórnin muni taka mark­viss skref á kjör­tíma­bil­inu til afnáms verð­trygg­ingar á lánum en sam­hliða þeim verði ráð­ist í mót­væg­is­að­gerðir til að standa vörð um mögu­leika ungs fólks og tekju­lágra til að eign­ast hús­næði. Auk þess segir að sér­stök áhersla verði lögð á að gæta efna­hags­legs stöð­ug­leika. „Rík­is­stjórnin vill enn fremur skapa hvata og stuðn­ing til þess að heim­ili sem það kjósa geti breytt verð­tryggðum lánum í óverð­tryggð,“ segir í sátt­mál­anum.[adspot]

Í apríl síð­ast­liðnum voru aðgerðir rík­is­stjórn­ar­innar til stuðn­ings lífs­kjara­samn­ingum aðila vinnu­mark­að­ar­ins kynntar. Þar á meðal er aðgerð um að draga úr vægi verð­trygg­ingar og birt var yfir­lýs­ingrík­is­stjórn­ar­innar um þau mark­vissu skref sem tekin verða á gild­is­tíma kjara­samn­ing­anna til afnáms verð­trygg­ingar á lánum.

Liður í þeirri vinnu er skipun nefnd­ar­innar en verk­efni hennar er að skoða aðferða­fræði við útreikn­ing vísi­tölu neyslu­verðs út frá alþjóð­legum sam­an­burði og leita álits erlendra sér­fræð­inga. Meðal ann­ars verður aðferða­fræði við hús­næð­islið vísi­töl­unnar tekin til athug­unar auk svo­kall­aðs vísi­tölu­bjaga.

Nefndina skipa:

• Benedikt Árnason, for­sæt­is­ráðu­neyti, for­maður
• Dagný Ósk Ara­dóttir, til­nefnd af BSRB
• Georg Brynjars­son, til­nefndur af BHM
• Hannes G. Sig­urðs­son, til­nefndur af Samtökum atvinnu­lífs­ins
• Heiðrún Erika Guð­munds­dóttir, til­nefnd af Hagstofu Íslands
• Henný Hinz, til­nefnd af Alþýðu­sam­bandi Íslands
• Karen Á. Vign­is­dóttir, til­nefnd af Seðla­banka Íslands
• Oddur Jak­obs­son, til­nefndur af Kenn­ara­sam­bandi Íslands
• Sigurður Páll Ólafsson, til­nefndur af fjár­mála- og efna­hags­ráðu­neyt­inu
• Sigurður Á. Snævarr, til­nefndur af Sambandi íslenskra sveit­ar­fé­laga.