„Þetta er hræðilegt og þá sérstaklega út af börnunum okkar. Ég hef ekki hugmynd hvað bíður okkar en ég veit að þetta verður ekki auðvelt. Þetta er ekki auðvelt,“ sagði Adelwahab Saad, tveggja barna faðir, þegar blaðamaður Stundarinnar náði tali af honum um klukkan sjö í kvöld. Fjölskyldan fékk þær upplýsingar í dag að lögreglumenn komi til með að flytja þau upp á Keflavíkurflugvöll í nótt þar sem þeim verður flogið til Ítalíu. Þetta er gert þrátt fyrir að bæði börn þeirra Saad og eiginkonu hans Fadilu hafði fæðst hér á landi og þekki ekkert annað. Það eru þau Hanif, sem er tveggja ára, og Jónína, sem er sex mánaða.

Uppfært: Barnavernd kom í veg fyrir flutning barnanna úr landi.

Þetta staðfestir lögfræðingur fjölskyldunnar, Árni Freyr Árnason.

„Þarna er verið að framfylgja úrskurði frá því fyrr á þessu ári sem kvað svo á um að þau uppfylltu ekki ákveðin skilyrði og ættu því ekki að fá hæli hér á landi. Þá var lögð fram sú beiðni um að réttaráhrifum þess úrskurðar yrði frestað svo hægt væri að láta reyna á vafaatriði fyrir dómstólum en bæði Útlendingastofnun og kærunefnd útlendingamála höfnuðu því núna í ágúst,“ segir Árni Freyr. Hann viti ekkert hvað bíði fjölskyldunnar á Ítalíu, hvort kerfið ytra sjái til þess að fjölskyldan fái að vera saman eða ekki. Eitt sé þó víst og það sé að lögreglumenn mæta á heimili fjölskyldunnar í nótt og hún flutt með valdi upp á Keflavíkurflugvöll.

Þegar Árni Freyr heyrði af því að senda ætti fjölskylduna úr landi á næstu vikum þá hafði hann aftur samband við bæði Útlendingastofnun og kærunefnd útlendingamála og lagði hann fram þá beiðni að stofnunin myndi endurskoða ákvörðun sína varðandi frestun réttaráhrifa. Því var líka hafnað.

Heitir Jónína í höfuðið á ljósmóður

Stundin hefur áður fjallað um fjölskylduna en Abdelwahab Saad flúði frá heimalandi sínu, Togo, fyrir tíu árum síðan vegna pólitískra ofsókna. Hann og eiginkona hans, Fadila, hafa nú dvalið hér á landi í tvö ár og eiga tvö börn, annars vegar tveggja ára soninn Hanif, sem er nýbyrjaður á leikskóla og hins vegar sex mánaða gamla dóttur sem heitir Jónína. Jónína er nefnd eftir íslenskri ljósmóður sem reyndist þeim vel. Bæði Hanif og Jónína eru með íslenska kennitölu og hafa búið á Íslandi frá fæðingu. Um einmitt þetta snýst umrætt vafatriði um því í ákvæði útlendingalaganna er kveðið svo á um að óheimilt sé að vísa frá eða úr landi útlendingi sem hafi frá fæðingu átt hér óslitið fasta búsetu samkvæmt Þjóðskrá.

Það liggur skýrt fyrir að börnin hafi átt hér óslitið fasta búsetu en það hafi þau hinsvegar ekki gert samkvæmt Þjóðskrá. Hvers vegna samt? Af hverju hafa þau ekki búið hérna óslitið samkvæmt Þjóðskrá? Jú því hælisleitendur fá ekki gefna neina stöðu hjá Þjóðskrá. Börnin hafi fengið það sem kallast „utanskrár kennitala“ og það sé skráning utan Þjóðskrár og því hafi þau ekki rétt samkvæmt þessu ákveðna ákvæði að vera hér á landi.

Börnin fá ekki að njóta vafans

„Þetta er það sem manni finnst svo skrítið. Kerfið fær alltaf að njóta vafans. Þarna er klárlega vafaatriði á ferðinni og við höfum bent á það og bíðum nú álits umboðsmanns Alþingis en í stað þess að leyfa þeim að njóta vafans, börnum fæddum 2014 og 2016, þá er þetta ekki talið nógu sérstakt eða aðkallandi til þess að réttlæta það að bíða með að vísa þessum börnum og foreldrum þeirra úr landi.“

„Ég er ekki búinn að pakka
og ég ætla ekki að pakka“

Saad segir sig og fjölskyldu sína ekki vera byrjaða að pakka ofan í tösku.

„Nei, ég er ekki búinn að pakka og ég ætla ekki að pakka. Þetta er heimilið okkar. Sonur minn er að byrja í leikskóla í næsta mánuði og við eigum hér fullt af vinum sem við lítum á sem fjölskylduna okkar. Vinir sem okkur langar að halda áfram að hitta. Þetta er mikið áfall fyrir okkur.“