Ummæli eiginkonu Bjarna Benediktssonar, fjármála- og efnahagsráðherra, um notkun þeirra hjóna á framhjáldsvefnum Ashley Madison samræmast ekki þeim upplýsingum sem fram koma í gögnunum sem lekið var á netið. 

Þóra Margrét Baldvinsdóttir, eiginkona Bjarna, fullyrðir að þau hjón hafi búið til aðgang á vefnum árið 2008 en aldrei notað hann eftir það. Samkvæmt fyrirliggjandi gögnum hefur aðgangurinn hins vegar verið uppfærður að minnsta kosti þrisvar sinnum frá því að hann var stofnaður, síðast í ársbyrjun 2013.

Uppfært: Allt bendir til þess að uppfærslurnar á aðgangi Bjarna 2013 og 2011 hafi verið hluti af sjálfvirkri uppfærslu á vefnum. Síðasta virknin á aðgangi Bjarna átti sér stað um mánuði eftir að aðgangur hans var stofnaður, eða í október 2008. 

Þóra Margrét eiginkona Bjarna

Mynd: Af vef Sjálfstæðisflokksins

Orðrétt segir Þóra Margrét á Facebook: „Kæru vinir. Ekki er öll vitleysan eins. Okkur hjónum hafa borist margar ábendingar um að nú sé talsvert rætt manna í milli um að gamalt netfang Bjarna tengist gögnum af Ashley Madison vefnum sem dreift hefur verið á netinu. Svona getur forvitnin leitt mann í gönur. Við heyrðum um þennan umdeilda vef í erlendum fréttum fyrir um 7 árum (2008). Í framhaldi af því skoðuðum við vefinn fyrir forvitnissakir, en til þess þurfti að fylla út þar til gert form, skrá netfang, erlent póstnúmer og fleira sem við gerðum í algjörum hálfkæringi og af léttúð. Við höfum aldrei síðan farið inn á þennan vef. Það var aldrei greitt fyrir skráningu eða aðgang að vefnum. Þessi heimsókn hefur ekki leitt til samskipta við nokkurn mann, hvað þá trúnaðarbrots af neinum toga. Ekki er allt sem sýnist á netinu. Ást og friður.“

„Við höfum aldrei síðan farið inn á þennan vef.“

Aðstoðarmenn Blaðamenn Stundarinnar hafa hringt daglega í Svanhildi og Teit, aðstoðarmenn Bjarna, eftir að gögnum Ashley Madison-síðunnar var lekið. Þau hafa ekki svarað, þrátt fyrir að fjallað sé um samskipti við fjölmiðla í leiðbeinandi erindisbréfi aðstoðarmanna.

Aðstoðarmenn Bjarna Benediktssonar, fjármála- og efnahagsráðherra, hafa hunsað símtöl og tölvupóst frá Stundinni eftir að gögnum Ashley Madison-vefsins var lekið á netið fyrr í þessum mánuði. Stundin hefur ítrekað reynt að ná sambandi við Teit Björn Einarsson og Svanhildi Hólm Valsdóttur, aðstoðarmenn Bjarna Benediktssonar og einnig ráðherra sjálfan. Aðstoðarmennirnir hafa látið undir höfuð leggjast að svara í síma og að svara tölvupóstum frá Stundinni, en samkvæmt leiðbeinandi erindisbréfi fyrir aðstoðarmenn sem forsætisráðuneytið sendi ráðuneytunum um síðustu áramót ber aðstoðarmönnum að fylgjast með fjölmiðlaumfjöllun og veita fjölmiðlum viðbrögð. Í siðareglum starfsmanna stjórnarráðsins er einnig fjallað um samskipti við fjölmiðla, en fram kemur að starfsfólki stjórnarráðsins beri að veita upplýsingar greiðlega og með kerfisbundnum hætti.

Aðgangurinn var búinn til 13. september 2008 skömmu fyrir miðnætti, en þá var Bjarni Benediktsson óbreyttur þingmaður Sjálfstæðisflokksins. Ekki var greitt fyrir skráninguna. Samkvæmt gögnum sem sjá má á síðunni var aðgangurinn uppfærður þremur árum seinna eða 21. október 2011 og aftur þann 25. janúar árið 2013, skömmu eftir miðnætti. Staðsetningin sem gefin er upp er bærinn Bradenton í Flórída en í þeim bæ átti faðir Bjarna, Benedikt Sveinsson, hús um tíma. 

Sá fæðingardagur sem gefinn er upp er 25. janúar 1970, en Bjarni á afmæli 26. janúar. Ekki er hægt að sjá hver öryggisspurningin er, en svarið við henni er MR. Bjarni er fyrrum nemandi í Menntaskólanum í Reykjavík.

DV greindi frá því í síðustu viku að maður úr stjórnmálaheiminum væri á meðal þeirra sem notað hefðu Ashley Madison. Var lesendum boðið að sjá lýsingar Íslendinga á síðunni og byrjaði frétt DV á lýsingu Bjarna. Skömmu síðar var Bjarni fenginn í forsíðuviðtal en ekki spurður um málið.  

Eftirfarandi lýsing er gefin upp á aðganginum sem tengdur er netfangi Bjarna: „Its about being interested in a nice looking woman, wanting to have an intelligent and fun conversation and good...very good sex. Im not from the States but do travel quite often.“ Nafn aðgangsins er Icehot1.