Svona eignaðist Kaupfélag Skagfirðinga virkjunarkost: „Ég var 100 prósent viss“

Kaup­fé­lag Skag­firð­inga keypti 50 pró­senta hlut í félagi utan um virkj­un­ar­kost­inn Vill­inga­nes­virkjun í  Hér­aðs­vötnum í Skaga­firði af Rarik á kostn­að­ar­verði í árs­lok 2012 eftir að hafa hafa gengið inn í samn­inga á milli Rarik og Lands­virkj­unar.

Kaup­fé­lagið og Rarik áttu saman félagið Hér­aðs­vötn ehf. sem hélt utan um virkj­un­ar­kost­ina. Rarik og Lands­virkjun eru opin­berir aðilar og segir Tryggvi Þór Har­alds­son, for­stjóri Rarik, að fyr­ir­tækið hafi ætlað að selja Lands­virkjun hlut sinn í virkj­un­ar­kost­inum á kostn­að­ar­verði vegna þess að fyr­ir­tækin eru bæði í eigu rík­is­ins. Hann segir hlut­inn í Hér­aðs­vötnum hafa verið seldan af því verk­efnið hent­aði Rarik ekki lengur. 

Vill­inga­nes­virkjun og einnig Skata­staða­virkjun í Skaga­firði hafa verið í umræð­unni síð­ustu daga vegna fyr­ir­hug­aðrar bygg­ingar álvers á Haf­urs­stöðum í Skaga­byggð. Fyr­ir­tækið Klappir Develop­ment skipu­leggur fram­kvæmd­irnar en ekki liggur fyrir hvaðan 206 mega­vöttin sem þarf til að reka álverið fyrst um sinn eiga að koma. Í við­tali við Stundina í gær sagði Ingvar Skúli Unn­steins­son, for­svars­maður Klappa, að fyr­ir­tækið horfði fyrst og fremst til orku Blöndu­virkj­unar. Sú orka er hins vegar full­nýtt og kallar bygg­ing álvers­ins á bygg­ingu nýrra virkj­ana.

„Ég taldi mig vita að þetta væri með sam­þykki norð­an­manna“

Hélt að Rarik hefði samþykki kaupfélagsins

Þegar samn­ingar og verð á hlutnum í Hér­aðs­vötnum lágu fyrir, og Sam­keppn­is­eft­ir­litið var búið að sam­þykkja við­skiptin, virkj­aði Kaup­fé­lag Skag­firð­inga hins vegar for­kaups­rétt­ar­á­kvæði sem er í sam­þykktum Hér­aðs­vatna ehf. og fékk hlut Rarik í virkj­un­ar­kost­inum því á sama verði og Lands­virkjun ætl­aði að kaupa hlut­inn á, segir Tryggi Þór. „Þessar við­ræður á milli okkar og Lands­virkj­unar stóðu yfir í kannski eitt og hálft ár. Ég taldi mig vita að þetta væri með sam­þykki norð­an­manna. Þegar við vorum búin að ná saman við Lands­virkjun um að þeir keyptu bara okkar hlut í Hér­aðs­vötnum, og að þeir ynnu bara með norð­an­mönnum í þessu verk­efni, þá virkj­uðu þeir for­kaups­rétt sem var í hlut­hafa­sam­komu­lagi. Ég hélt að þetta væri bara tíma­bundið á meðan þeir héldu ein­hverjum samn­inga­við­ræðum áfram við Lands­virkjun um hvernig þeir kæmu inn í Hér­aðs­vötn. En mér skilst að það hafi ekki orðið ennþá.“