Almennur borgari fann skó af gerðinni Dr. Martens nærri Hafnarfjarðarhöfn fyrir miðnætti í gær. Lögreglan leitaði á svæðinu og bað sjálfboðaliða að halda sig fjarri.

Lögreglan segir nú að skórnir séu í eigu Birnu Brjánsdóttur, sem hvarf í miðborg Reykjavíkur aðfararnótt laugardags. Fram hafði komið að Birna var klædd í svarta Dr. Martens skó þegar hún hvarf. Lögreglan lokaði svæði í kringum Hafnarfjarðarhöfn vegna leitarinnar.

Lögreglan sagði frá því fyrr í dag að mögulegt væri að skónum hefði verið komið fyrir. Þéttur snjór hafi verið undir sólanum, en snjólaust var nóttina þegar Birna hvarf.

Ljósmyndir af skónum hafa birst á samfélagsmiðlum, meðal annars á Facebook-síðu sem var sett upp sérstaklega vegna leitarinnar. Þær hafa nú verið fjarlægðar og hefur maðurinn, sem fann skóinn, farið fram á að myndin af skónum verði fjarlægð. Hún hefur birst á helstu vefmiðlum.

Lögreglan á höfuðborgarsvæðinu, Landhelgisgæslan og björgunarsveitir hafa leitað að Birnu undanfarna daga ásamt fjölda sjálboðaliða, vina og ættingja hennar. Eina vísbendingin sem yfirvöld hafa unnið með er sú staðreynd að sími Birnu tengdist símamastrinu á gömlu slökkvistöðinni í Hafnarfirði klukkan 05:50 aðfaranótt laugardags en stuttu síðar slökknaði á símanum. Í fyrstu var talið að síminn hefði orðið batteríslaus en lögreglan sagði á blaðamannafundi í dag að einhver hafi slökkt á honum handvirkt.

Grunsamlegar mannaferðir á myndbandi

Þá barst Stundinni myndskeið í gærkvöldi sem tekið er úr öryggismyndavél í versluninni Macland. Verslunin er á Laugavegi 23 en það var á Laugavegi 31 þar sem hún hverfur sjónum um klukkan 05:25 samkvæmt þeim upptökum sem lögreglan hefur skoðað úr öryggismyndavélum á og við Laugaveginn. Í umræddu myndskeiði sem Stundin birtir með fréttinni sést rauða bifreiðin sem lögreglan hefur leitað að frá því á laugardaginn. Bifreið sem lögreglan telur vera rauða Kia Rio.

Það sem vekur athygli í myndskeiðinu er að rétt áður en rauða bifreiðin keyrir fram hjá Macland þá sést maður í hvítum skóm hlaupa upp Laugaveginn. Stuttu eftir að rauða bifreiðin keyrir fram hjá Macland sést annar maður hlaupa niður Laugaveginn. Haft var samband við lögregluna vegna þessa myndskeiðs en Stundin fékk þau svör að ekki væri hægt að tjá sig um málið að svo stöddu. Samkvæmt heimildum Stundarinnar eru þessar mannaferðir álitnar „grunsamlegar.“

Uppfært 19.01.2017: Grímur Grímsson yfirlögregluþjónn telur ekki að aðilarnir sem sjást hlaupa á myndbandinu eða ganga öðrum myndböndum sem birt hafa verið tengist hvarfi Birnu. 

Hvarf Birnu er rannsakað út frá því að hún hafi horfið í Reykjavík eða Hafnarfirði, allt eftir því hvort hún hafi verið aðskilin frá síma sínum eða ekki. Hún sást á öryggismyndavélum á Laugavegi, en virðist ekki hafa farið lengra en Laugaveg 31. Leitað er að ökumanni á Rauðum Kia Rio sem ók á Laugaveginum sömu mínútu, eða klukkan 05:25.

Samkvæmt mati lögreglu sem birtist í Kastljósinu í kvöld er talið ólíklegt, vegna tímaraðar, að Birna hafi farið inn í bílinn.

Hér sést Birna Brjánsdóttir á göngu á Laugaveginum mínúturnar áður en hún hvarf.