Ekkert dvalargjald verður rukkað fram að 36 stundum á hverri viku í leikskólum borgarinnar og hvatar verða settir til að stytta dvalartíma barna á föstudögum. Vistun umfram það mun hækka í þrepum fyrir hverjar þrjátíu mínútur sem bætt er við. Þetta er meðal þess sem stýrihópur um leikskólamál í Reykjavíkurborg leggur til.
Samkvæmt borginni getur sparnaður numið allt að 168 þúsund krónum á ári fyrir fjölskyldur sem nýta sér úrræðið. Sem dæmi mun gjald fyrir 38 tíma vistun verða 7.000 krónur á mánuði auk fæðisgjalds. Borgin segir gjaldið mun lægra en í fyrri tillögum og að tekið hafi verið tillit til athugasemda í samráði.
„Við erum ekkert að skerða leikskóladaginn,“ sagði Helga Þórðardóttir, oddviti Flokks fólksins og meðlimur stýrihópsins, og bætti við að „það er bara breytt gjaldskrá“. Hámarksdvalartími helst óbreyttur, 42,5 klukkustundir á viku, og ekki er gert ráð fyrir fækkun leikskólaplássa.
Skoðuðu leiðir hinna sveitarfélaganna
Borgin segir breytingarnar ætlaðar til að draga úr fáliðun, auka fyrirsjáanleika og tryggja stöðuga mönnun yfir árið. Samkeppni um starfsfólk á höfuðborgarsvæðinu og stytting dvalartíma annars staðar hafi skapað áskoranir í Reykjavík.
„Markmiðið okkar er að ná umbótum í leikskólum,“ sagði Líf Magneudóttir, formaður stýrihóps um leikskólaleiðina og oddviti Vinstri grænna, þegar tillögurnar voru kynntar. „Við erum að stíga risastórt skref í áttina að endurgjaldslausum leikskóla.“
Líf sagði að leiðir annarra sveitarfélaga hefðu verið skoðaðar og að mikið samráð hefði verið haft við starfsfólk, stjórnendur og foreldra í gegnum foreldrafélög skólanna. Helga sagði að „langt og strangt samráðsferli“ hefði farið fram og að tillögurnar nú væru ólíkar þeim sem lagðar voru fram í samráðsgátt í byrjun árs. Fjöldi umsagna hefði borist sem hefðu haft áhrif á vinnu stýrihópsins.
Mátu sérstaklega áhrif á konur
Sérstakt jafnréttismat var framkvæmt á tillögunum og segir Líf það hafa verið gert til að meta hvaða áhrif breytingarnar hefðu á konur. „Við viljum alls ekki að breytingar sem við ráðumst í komi niður á konum, að það skekki jafnrétti kynjanna,“ sagði Líf. Horft hafi verið til þess að taka tillit til stöðu einstæðra og einstakra foreldra og fólks með lítið bakland.
Samkvæmt tilkynningu borgarinnar verða nýir afsláttarflokkar teknir upp fyrir einstæða foreldra og tekjulágar fjölskyldur sem þurfa lengri vistun. Samkvæmt jafnréttismati borgarinnar leiðir ný gjaldskrá til verulegra lækkana fyrir stóran hóp foreldra. Hækkanirnar snerta einkum lengstu vistunartímana og tekjuhærri foreldra.
„Þetta eru ekki einu aðgerðirnar sem við þurfum að ráðast í,“ sagði Líf um framhaldið. „Þetta er bara fyrsti áfangi. Við þurfum auðvitað að gera meira, og það kemur þá á næsta kjörtímabili.“
Systkini sameinuð á leikskólum
Tillögurnar gera ráð fyrir að systkinasameining verði tryggð með ákveðnum skilyrðum í „stóru innrituninni“ í mars. Skilyrðin fela meðal annars í sér að viðkomandi leikskóli sé fyrsta val, að eldra systkini verði áfram í að minnsta kosti sex mánuði og að börnin séu með sama fjölskyldunúmer í þjóðskrá.
„Við bíðum eftir að fá formlega lagaheimild,“ sagði Skúli Helgason, borgarfulltrúi Samfylkingarinnar sem átti sæti í hópnum, og benti á að fyrir þinginu lægi lagafrumvarp sem heimilaði systkinaforgang.
Einnig verða stofnuð ný stöðugildi umsjónarfólks leikskólahúsnæðis sem sinna minniháttar viðhaldi og daglegum rekstri húsnæðis. Með því er ætlað að létta á stjórnendum.
Athugasemdir