Sigmundur Davíð Gunnlaugsson forsætisráðherra hótar Sjálfstæðisflokknum kosningum í Facebook-færslu sinni, án þess þó að hafa ráðfært sig við þingflokk sinn.
Sigmundur kom af fundi með forseta Íslands á Bessastöðum nú í hádeginu. „Við vorum að spjalla. Við sjáum til með þetta allt saman. Bless bless,“ sagði hann eftir fundinn.
Ólafur Ragnar greindi hins vegar fréttamönnum frá fundinum. Kom þá í ljós að hann hafði neitað Sigmundi um heimild til að boða kosningar.
Hótaði Bjarna þingrofi
Sigmundur hitti Bjarna Benediktsson, formann Sjálfstæðisflokksins, á fundi í morgun og svaraði áhyggjum hans af stöðu ríkisstjórnarinnar með þeim orðum að hann myndi boða kosningar ef sjálfstæðismenn treystu sér ekki til að styðja ríkisstjórnina.
„Jafnframt fór ég yfir það með formanni Sjálfstæðisflokksins að ef þingmenn flokksins treystu sér ekki til að styðja ríkisstjórnina við að ljúka sameiginlegum verkefnum okkar myndi ég rjúfa þing og boða til kosninga hið fyrsta,“ segir Sigmundur í færslu sinni um fundinn.
Samkvæmt orðum Karls Garðarssonar, þingmanns Framsóknarflokksins, í hádegisfréttum RÚV, ráðfærði Sigmundur sig ekki við þingflokk Framsóknarflokksins áður en hann sendi út yfirlýsinguna. „Hann hefði kannski átt að segja þingflokknum frá þessu fyrst,“ sagði Karl og kveðst myndu hafa gert þetta öðruvísi.
Guðlaugur Þór Þórðarson, þingmaður Sjálfstæðisflokksins, sagði: „Það ber okkur enginn til hlýðni“. Hann sagði að í ljós kæmi hvað tæki við.
Svarar fyrir ákvarðanir sínar með ánægju
Sigmundur fer yfir stjórnmálaferil sinn í færslu sinni fyrir stundu.
„Hvort sem litið er til stjórnmálabaráttu undanfarinna ára og alls þess sem þar hefur gengið á, bæði opinberlega og innbyrðis, eða til persónulegra málefna fjölskyldu minnar get ég óhræddur, óhikað og með ánægju svarað fyrir verk mín og ákvarðanir. Þegar ég ákvað að hefja þátttöku í stjórnmálum gerði ég það vegna þess að ég hafði ákveðna sýn á hvað væri nauðsynlegt að gera til að koma íslensku samfélagi á réttan kjöl og gera því kleift að nýta þau óþrjótandi tækifæri sem þjóðin býr yfir, samfélaginu öllu til heilla. Það hefur gengið betur en jafnvel ég þorði að vona að vinna að þeirri framtíðarsýn og henni mun ég fylgja áfram á meðan mér gefst tækifæri til.“
Bjarni ræddi um „ráðstafanir“
Bæði Heimdallur, félag sjálfstæðismanna í Reykjavík, og sjálfstæðismenn á Akureyri, hafa farið fram á afsögn Sigmundar Davíðs. Þá hafa framsóknarmenn á Akureyri farið fram á „tafarlausa afsögn“ formanns síns úr embætti forsætisráðherra.
Vangaveltur hafa verið um hvort Sigmundur stígi úr stóli forsætisráðherra, án þess þó að ríkisstjórnarsamstarfinu ljúki. Hann virðist hins vegar ekki vera tilbúinn til þess og hefur neitað að segja af sér.
Bjarni Benediktsson sagði í samtali við fréttir Sjónvarpsins í gær að staða Sigmundar væri óheppileg. „Það er auðvitað alltaf óheppilegt þegar menn þurfa að bæta í skýringar eftir að máli vindur fram.“
Bjarni neitaði aðspurður að lýsa stuðningi við Sigmund. „Svona spurningum ætla ég ekkert að svara vegna þess að þannig gerast nú ekki hlutirnir þar sem ég er í samstarfi, að menn fái stuðningsyfirlýsingar eða vantraustsyfirlýsingar í fjölmiðlum. Við þurfum einfaldlega að vinna þetta eins og almennilegt fólk, setjast niður yfir stöðuna og meta það hvort við teljum okkur hafa nægilegan stuðning til þess að sinna þeim verkefnum sem okkur voru falin og sett á dagskrá. Hvað er til bragðs að taka, hvort ríkisstjórnin treystir sér til þess að halda áfram, eftir atvikum eftir einhverjar ráðstafanir.“
Facebook-færsla Sigmundar í heild sinni:
Nú í morgun átti ég mjög góðan fund með Bjarna Benediktssyni, formanni Sjálfstæðisflokksins. Við ræddum árangur ríkisstjórnarinnar og mikilvægi þess að klára þau stóru verkefni sem undirbúin hafa verið síðustu misseri og ár. Mörg þeirra eru gríðarlega mikilvæg fyrir íslenskt samfélag. Meðal annars þarf að ljúka afnámi fjármagnshafta, endurskipuleggja fjármálakerfið svo að það virki í þágu almennings, ljúka því sem ríkisstjórnarflokkarnir höfðu samþykkt um afnám verðtryggingar og innleiða umfangsmiklar úrbætur í húsnæðismálum. Mörgum þessara verkefna hefði ég viljað sjá vinda hraðar fram en enn er þó nægur tími til að klára þau, sé viljinn fyrir hendi.
Jafnframt fór ég yfir það með formanni Sjálfstæðisflokksins að ef þingmenn flokksins treystu sér ekki til að styðja ríkisstjórnina við að ljúka sameiginlegum verkefnum okkar myndi ég rjúfa þing og boða til kosninga hið fyrsta.
Ég er stoltur af verkum mínum í stjórnmálum til þessa og óhræddur við að leggja þau í dóm kjósenda hvort sem það verður gert nú eða síðar. Ég er líka stoltur af eiginkonu minni og þeim heiðarleika og fórnfýsi sem hún hefur ætíð sýnt.
Hvort sem litið er til stjórnmálabaráttu undanfarinna ára og alls þess sem þar hefur gengið á, bæði opinberlega og innbyrðis, eða til persónulegra málefna fjölskyldu minnar get ég óhræddur, óhikað og með ánægju svarað fyrir verk mín og ákvarðanir. Þegar ég ákvað að hefja þátttöku í stjórnmálum gerði ég það vegna þess að ég hafði ákveðna sýn á hvað væri nauðsynlegt að gera til að koma íslensku samfélagi á réttan kjöl og gera því kleift að nýta þau óþrjótandi tækifæri sem þjóðin býr yfir, samfélaginu öllu til heilla. Það hefur gengið betur en jafnvel ég þorði að vona að vinna að þeirri framtíðarsýn og henni mun ég fylgja áfram á meðan mér gefst tækifæri til.
Athugasemdir