Sigmundur Davíð: „Mun aldrei gefast upp fyrir skíthælunum sem hafa þráð að drepa mig“

Sig­mundur Davíð Gunn­laugs­son, for­maður Fram­sókn­ar­flokks­ins, upp­nefndi and­stæð­inga sína „skít­hæla“ á fundi með fram­sókn­ar­mönnum í Skaga­firði á dög­unum. Þetta kemur fram í dálknum Orðið á göt­unni á Eyjunni.is, sem er í eigu vinar Sig­mundar, sem ber heitið „Nótt hinna löngu hnífa?“

Þar kemur fram að Sig­mundur hafi verið spurður að því á fund­inum hvort hann hefði ekki hug­leitt að hætta og var svar hans:

„Ég mun aldrei gef­ast upp fyrir skít­hæl­unum sem hafa þráð að drepa mig“

„Ætli þetta sé ekki þrjóska. Ég mun aldrei gef­ast upp fyrir skít­hæl­unum sem hafa þráð að drepa mig frá því ég byrj­aði í póli­tík. Ef þeim tekst ætl­un­ar­verk sitt verður það aðeins með því að þeim tak­ist að fá fram­sókn­ar­menn sjálfa, fólkið sem ég hef verið að vinna fyrir, til að sjá um aftök­una.“

Formaður Fram­sókn­ar­fé­lags Skaga­fjarðar, Jóhannes Björn Þor­leifs­son, var á fund­inum. Þegar blaða­maður bar ummælin undir hann sagði hann: „Þetta var svo sem bara á lok­uðum fundi Fram­sókn­ar­manna þannig ég vil ekk­ert tjá mig neitt um það.“ Að því loknu skellti Jóhannes á.

Áður reynst sannspár um gjörðir Sigmundar

Aðal­eig­endi Eyjunnar er Björn Ingi Hrafns­son, náinn vinur Sig­mundar Davíðs. Í Orðinu á göt­unni var spáð fyrir um að Sig­mundur myndi sækj­ast eftir heim­ild til þess að rjúfa þing, sem hann gerði, en fyr­ir­ætl­anir hans fóru út um þúfur þegar Ólafur Ragnar Grímsson for­seti synj­aði honum um heim­ild­ina og hélt blaða­manna­fund um málið.

Sig­mundur Davíð og Björn Ingi í afmæli Sig­mundar

Mynd: mbl.is/​Eva Björk Ægis­dótt­ir

Í slúð­ur­dálknum sagði þá frá þess­ari lausn á vanda Sig­mundar: „Einn mögu­leik­inn enn hefur verið nefndur. Hann er sá að for­sæt­is­ráð­herra sprengi allt í loft upp, rjúfi hrein­lega þing og boði til kosn­inga. Fari um landið og skýri sitt mál og ræði árangur rík­is­stjórn­ar­innar. Segi sem svo, að vita­skuld sé þetta mál erfitt og hafi valdið sér skaða, en hann vilji leggja öll spilin á borðið, hvetji aðra til að gera slíkt sama og leggi verk sín óhræddur í dóm kjós­enda.“

Aftökusveitin

Nokkrir aðilar innan Fram­sókn­ar­flokks­ins hafa gagn­rýnt for­mann­inn og kallað eftir nýrri for­ystu. Hösk­uldur Þór­halls­son sæk­ist til dæmis eftir fyrsta sæti í próf­kjöri Fram­sókn­ar­flokks­ins í Norð­aust­ur­kjör­dæmi fyrir kom­andi þing­kosn­ingar í haust. Hann hefur jafn­framt skorað á Sigurð Inga Jóhans­son, for­sæt­is­ráð­herra og vara­for­mann flokks­ins, til þess að gefa kost á sér til for­mennsku á kom­andi flokks­þingi. Sigurður sé „ótví­rætt best til þess fall­inn að leiða Fram­sókn­ar­flokk­inn í kom­andi þing­kosn­ingum,“ segir Hösk­uldur. 

Guðni Ágústs­son, fyrr­ver­andi for­maður Fram­sókn­ar­flokks­ins, virð­ist einnig vilja sjá for­manns­skipti eiga sér stað. Í við­tali við Frétta­blaðið í vik­unni sagði hann eng­ann mann vera stærri en flokk­inn og að Panama hneyksli for­manns­ins gæti yfir­skyggt kosn­inga­bar­átt­una: „Nú finn ég að þó að mönnum þyki vænt um Sigmund Davíð, ótt­ast menn að þessi vondu mál sem hann hefur orðið fyrir muni yfir­skyggja alla kosn­inga­bar­áttu og skaða árangur flokks­ins í kosn­ing­unum.“

Guðni virð­ist svo vera með ákveð­inn mann í huga til þess að taka við for­manns­emb­ætt­inu: „Sigurður Ingi hefur staðið sig mjög vel. Hann tók við for­sæt­is­ráð­herra­starf­inu við mjög erf­iðar aðstæður í byrjun apríl en hefur staðið sig frá­bær­lega og haldið vel um málin síðan. Hann sættir öfl, hann friðar þing og róar það niður, hann hefur verið auð­mjúkur og getað talað við alla, þannig að hann gerir þetta eins og best verður gert.“

Svein­björn Eyj­ólfs­son, for­stöðu­maður nauta­stöðvar Bænda­sam­taka Íslands, hefur svo gefið kost á sér til emb­ætt­is for­manns Fram­sókn­ar­flokks­ins. Hann hefur jafn­framt sagt að ef ein­hver annar sem kalla mætti „öfl­ugri fram­bjóð­anda“ færi fram, „þá mun ég nú mjög fljót­lega draga mig í hlé.“  

Ekki náð­ist sam­band við Þorleif Karl Egg­erts­son, for­mann kjör­dæma­sam­bands fram­sókn­ar­manna í Norð­vest­ur­kjör­dæmi, Sigmund Davíð Gunn­laugs­son eða Jóhannes Þór Skúlason, aðstoð­ar­mann hans, við vinnslu frétt­ar­innar.