Þingmaður Bjartrar framtíðar komin með 2,3 milljónir í laun sem kjörinn fulltrúi

„Mér fannst það sama eiga að gilda um konur,“ segir Theodóra S. Þor­steins­dóttir, þing­flokks­for­maður Bjartrar fram­tíðar, sem hefur á grund­velli fyrri for­dæma ákveðið að halda áfram að starfa í bæj­ar­stjórn Kópa­vogs­bæjar og sinna öðrum verk­efnum sam­hliða því að hún gegnir þing­mennsku. 

Theodóra sinnir nú sam­tals tveimur stöðu­gildum, eða 200% starfi, og þiggur laun upp á 2,3 millj­ónir króna sem kjör­inn full­trúi bæði á lands­vísu og sveita­stjórn­ar­stigi. Hún segir að þing­menn­irnir Gunnar Birg­is­son, Ármann Kr. Ólafsson og Birkir Jón Jónsson hafi einnig setið í bæj­ar­stjórn sam­hliða þing­mennsku. „Ég kynnti mér þetta sér­stak­lega fyrir kosn­ingar og fór yfir sög­una hér í Kópavogi. Það eru fjöl­margir bæj­ar­full­trúar hér í gegnum tíð­ina sem hafa verið þing­menn og bæj­ar­full­trúar. Og jafn­vel for­menn bæj­ar­ráðs. Þetta voru, held ég, allt karl­menn.“

Spurning um jafnræði

Nú þegar Theodóra er einnig komin á þing, fyrir utan að vera for­seti bæj­ar­ráðs og bæj­ar­full­trúi í Kópavogi, fær hún greiddar rúmar 2,3 millj­ónir króna á mán­uði fyrir störf sín sem kjör­inn full­trúi á vegum almenn­ings.

Meðlimir í bæj­ar­stjórn Kópa­vogs­bæjar fá 33 pró­sent af þing­far­ar­kaupi, for­maður bæj­ar­ráðs 45 pró­sent af þing­far­ar­kaupi og svo eru greiðslur fyrir að sitja í nefndum. Ofan á rúm­lega 1,1 milljón króna í laun sem þing­maður fær Theodóra 15 pró­sent álag fyrir að vera for­maður þing­flokks Bjartrar fram­tíðar. Þá fær hún sem þing­maður ýmsar skatt­frjálsar end­ur­greiðslur og ferða­styrki. Aðspurð er hún ekki viss hversu há laun hún er komin með að við­bættum auka­greiðslum. „Ég þyrfti bara að sjá það þegar mán­að­ar­mótin koma, hvernig það er.“

Theodóra telur það spurn­ingu um jafn­ræði að hún sinni þing­mennsku sam­hliða öðrum störfum. 

„Mig langar til þess að vera hér áfram bæj­ar­full­trúi. Það er bara eins og allir aðrir. Mér finnst það bara út frá jafn­ræði. Þegar ein­hver getur verið læknir eða skóla­stjóri eða hvað sem er, í 100 pró­sent starfi, finnst mér það alveg eiga við það að vera þing­maður. Það er auð­vitað þannig að ráð­herrar eru í 100 pró­sent starfi sem ráð­herrar og líka þing­menn. Og ég tal­aði alveg skýrt um þetta fyrir kosn­ingar. Ég var marg­spurð að þessu.“

Segir óljóst með heimildina til að hætta

Theodóra telur því eðli­legt að sinna starfi í bæj­ar­stjórn sam­hliða öðru starfi.

„Það er eins og alls staðar á land­inu. Fólk er alls staðar á land­inu í 100% starfi. Það er gert ráð fyrir því í sveit­ar­stjórn­ar­lögum.“

Hún vísar í laga­grein þessa efnis. Í sveit­ar­stjórn­ar­lögum er gert ráð fyrir að sveit­ar­stjórn­ar­menn hafi heim­ild til fjar­veru úr starfi til þess að sækja fundi á vegum sveit­ar­stjórnar: „Sveit­ar­stjórn­ar­maður á rétt á fjar­veru úr starfi að því leyti sem honum er nauð­syn­legt til að sinna lög­bund­inni mæt­ing­ar­skyldu á fundi í sveit­ar­stjórn, hjá nefndum sveit­ar­fé­lags­ins og á aðra fundi sem hann hefur verið kjör­inn til að sækja fyrir hönd sveit­ar­stjórnar.“

Í lögum um þing­sköp Alþingis er hins vegar kveðið á um mik­il­vægi starfs þing­manna: „Skylt er þing­mönnum að sækja alla þing­fundi nema nauð­syn banni.“

Spurð hvort hún telji rétt­læt­an­legt, út frá stöðu hennar og skyldum sem þing­maður, að sinna öðrum stöðum sam­hliða, seg­ist hún myndu draga úr skyldum sínum hjá Kópa­vogsbæ.

„Ég er að fóta mig í þessu og sjá hvernig þetta gengur upp.  Ég hugsa að ég dragi svo sem eitt­hvað úr,“ segir hún.

Auk starfa fyrir Kópa­vogsbæ og Alþingi situr Theodóra í stjórn Isavia sem kjör­inn full­trúi Kópa­vogs­búa. Það er best laun­aða stjórn­ar­setan hjá opin­beru fyr­ir­tæki. Hún ætlar að víkja úr þeirri stjórn eftir aðal­fund sem vænta má eftir um tvo mán­uði. Greiðslur fyrir stjórn­ar­setu í Isavia eru einar og sér 160 þús­und krónur á mán­uði. „Svo er helm­ing­ur­inn tek­inn af mér í skatt nátt­úru­lega,“ segir hún.

Launahækkun bæjarfulltrúa til umræðu

Grunn­laun alþing­is­manna voru hækkuð um 340 þús­und krónur á kjör­dag, 29. októ­ber síð­ast­lið­inn, upp í rúm­lega 1,1 milljón krónur. Greiðslur fyrir störf bæj­ar­full­trúa í Kópavogi eru reikn­aðar út sem hlut­fall af þing­far­ar­kaupi frá því fyrir hækkun kjara­ráðs á þing­far­ar­kaupi. Því er til umræðu í bæj­ar­stjórn­inni hvort hækka eigi greiðslur sam­kvæmt því. Theodóra seg­ist hafa verið andsnúin því að hækka laun bæj­ar­full­trúa með þeim hætti á fundi for­sætis­nefndar bæj­ar­stjórnar síð­asta þriðju­dag. Hún vilji fremur launa­hækk­anir tengdar launa­vísi­tölu.

Theodóra seg­ist hafa tekið ákvörðun um störf sín áður en kjara­ráð hækk­aði þing­far­ar­kaup. „Þetta var áður en að laun hækk­uðu hjá kjara­ráði. Svo komu þær skýr­ingar frá kjara­ráði að þeir væru að hækka þetta með þeim hætti til þess að þing­menn gætu sinnt þessu alger­lega. Þetta er bara eitt­hvað sem ég ætla að reyna.“

Þá seg­ist Theodóra óviss um hvort hún hafi laga­lega heim­ild til að segja sig frá bæj­ar­stjórn. „Ef ég ætla að segja af mér, sem full­trúi í sveit­ar­stjórn, þarf ég að gefa ákveðna skýr­ingu á því, flytja úr sveit­ar­fé­lag­inu eða ein­hverjar aðrar skýr­ingar. Ég veit ekki hvort lögin leyfi það að maður segi af sér af því að maður ger­ist þing­maður, að það dugi slík skýr­ing.“