Rannsókn héraðssaksóknara á Samherjamálinu er lokið og saksóknari mun taka ákvörðun um hvort ákært verði í því.
Níu eru með réttarstöðu sakbornings, þar á meðal Þorsteinn Már Baldvinsson sem nýhættur er sem forstjóri Samherja. RÚV greinir frá.
Upplýst var um málið í fréttaþættinum Kveik í nóvember 2019 í samstarfi við Stundina (forvera Heimildarinnar), Wikileaks og Al Jazeera. Jóhannes Stefánsson, fyrrverandi starfsmaður Samherja, steig fram sem uppljóstrari í málinu.
Málið varðar meintar mútugreiðslur Samherja til hátt settra embættismanna í Namibíu til að komast yfir fiskveiðiheimildir í landinu. Þá var hagnaðurinn tekinn út í gegnum flókið net félaga sem teygðu sig víða heim og vöktu upp spurningar um skattaundanskot.
Rannsóknin tók 5 ár og mikið af gögnum eru undir, þar á meðal á annað þúsund smáskilaboð á milli Þorsteins Más og Jóhannesar.
Þorsteinn Már steig tímabundið til hliðar sem forstjóri Samherja eftir að málið kom upp en tók svo við starfinu aftur. Hann hætti sem forstjóri 26. júní síðastliðinn og Baldvin Þorsteinsson sonur hans tók við sem forstjóri.
Þá höfðu Þorsteinn Már og Kristján Vilhelmsson fært hluti sína í Samherja til barnanna sinna sem eiga nú fyrirtækið.
Tveir namibískir ráðherrar sögðu af sér út af málinu, dómsmálaráðherra og sjávarútvegsráðherra.
Ólafur Þór Hauksson héraðssaksóknari tók fram í samtali við fréttastofu RÚV að málið hefði verið umfangsmikið og náð yfir langt tímabil. Það sé því áfangi, ákveðin kaflaskil, að klára þetta stóra mál.
Athugasemdir