Enginn vara­þing­maður hefur verið kall­aður inn fyrir Áslaugu Örnu Sig­ur­björns­dóttur, þing­mann Sjálf­stæð­is­flokks­ins, sem flutt er til New York borgar.

Tilkynnt var í vor að Sigurður Örn Hilm­ars­son mundi taka sæti Áslaugar Örnu eftir að hún ákvað að taka sér leyfi í níu mán­uði til að leggja stund á MPA nám við Columbia háskóla. Áslaug Arna beið lægri hlut í for­manns­kjöri Sjálf­stæð­is­flokks­ins í febr­úar gegn Guðrúnu Haf­steins­dóttur.

Vísir greindi frá því í gær að Áslaug Arna væri komin til New York. „Það er komið að þessu, ég er flogin til NYC og komin í gegnum landamæra­eft­ir­litið sem var ekk­ert mál með stu­dent visað,“ sagði hún á Instagram í gær. „Það eru smá blendnar til­finn­ingar að vera farin, en spenn­ingur á yfir­hönd­ina með miklum yfir­burðum sem betur fer.“

Alþingi er hins vegar ekki komið í sum­ar­frí og þing­fundur stendur yfir í dag. Eru þar meðal ann­ars veiði­gjöld til umræðu en þing­menn rík­is­stjórn­ar­innar hafa sakað stjórn­ar­and­stöð­una um mál­þóf og Sjálf­stæð­is­flokk­inn þar með­tal­inn.

Samkvæmt vef Alþingis hefur vara­maður ekki verið kall­aður inn fyrir Áslaugu Örnu og stjórn­ar­and­staðan því ekki full­skipuð á fundi dags­ins.