Sigmundur Davíð Gunnlaugsson, fyrrverandi forsætisráðherra, birti rétt í þessu bréf frá Ríkislögreglustjóra á Facebook-síðu sinni þar sem fram kemur að embættið hafi hætt rannsókn á meintu innbroti í tölvu hans. Í bréfinu kemur fram að ríkislögreglustjóri hafi óskað eftir frekari upplýsingum um málið frá rekstrarfélagi Stjórnarráðsins eftir að fjölmiðlar fjölluðu um meint innbrot í tölvu Sigmundar Davíðs í síðasta mánuði, en Sigmundur Davíð hélt því fram í ræðu á miðstjórnarfundi Framsóknarflokksins að brotist hafi verið inn í tölvu hans. Sigmundur var meðal annars gagnrýndur fyrir að hafa ekki tilkynnt lögreglu um innbrotið. Eftir að upplýsingar hafi borist frá rekstrarfélagi Stjórnarráðsins og lagt hafði verið á þær mat var það hins vegar niðurstaða ríkislögreglustjóra að hætta rannsókn málsins.
Samhliða bréfinu birtir Sigmundur Davíð langa færslu þar sem hann segir meðal annars að frá því að hann hóf þátttöku í stjórnmálum hafi hópur fólks talið það hlutverk sitt að reyna að gera flest það sem hann segir ótrúverðugt, allt frá stórum tillögum í efnahagsmálum að frásögn um hversdagslega atburði. Í tengslum við yfirlýsingar hans um meint innbrot í tölvu hans segir Sigmundur Davíð einn fjölmiðil hafa fengið „mann til að halda því fram að það að brotist hefði verið inn í tölvuna líktist vísindaskáldsögu,“ og vísar í viðtal Morgunútvarpsins á RÚV við Theódór Gíslason tölvuöryggissérfræðing, sem sagði meðal annars að öll tölvuinnbrot skilji eftir sig ummerki.
Sigmundur Davíð segir ennfremur að hann hafi fengið gögn þar sem fram kemur að tölvupóstur sem sendur var á hann, og látinn líta út fyrir að kæmi frá öðrum, hefði líklega innihaldið þekkta tölvuveiru að nafni „Poison Ivy backdoor“. „Um þá veiru segir í bréfi frá RFS: „Einkenni hennar eru þær að hún opnar bakdyr inn á tölvu viðkomandi fyrir aðgengi árásaraðila að tölvunni“. Þótt veiran hafi ekki fundist í tölvunni er tekið fram að „Algengt er með slíka veirur að árásaraðilinn hreinsar til eftir sjálfan sig að lokinni aðgerð“. Atvikið var skráð sem öryggisatvik hjá RFS,“ skrifar Sigmundur Davíð, en birtir hins vegar ekki umrætt skjal þar sem þessar upplýsingar koma fram, heldur einungis tilkynningu ríkislögreglustjóra um að hætta rannsókn.
Tilkynning Sigmundar Davíðs í heild:
Frá því að ég hóf þátttöku í stjórnmálum hefur hópur fólks talið það hlutverk sitt að reyna að gera flest það sem ég segi ótrúverðugt, allt frá stórum tillögum í efnahagsmálum að frásögn um hversdagslega atburði.
Á miðstjórnarfundi um daginn gerði ég grín að því að menn hefðu meira að segja talið það til marks um „paranoju“ að telja að menn myndu gera ýmislegt til að verja hagsmuni sem voru álíka miklir og verðmæti allra mannvirkja í Reykjavík og hringinn í kringum landið. Það var því skondin kaldhæðni að fréttir af fundinum næstu daga á eftir snérust aðallega um atriði sem ég hafði nefnt í framhjáhlaupi, þ.e. að brotist hefði verið inn í tölvuna mína, og leitast við að gera það ótrúverðugt. Einn fjölmiðill fékk mann til að halda því fram að það að brotist hefði verið inn í tölvuna líktist vísindaskáldsögu.
Í krafti upplýsingalaga hef ég nú fengið afhent gögn sem varða málið frá Ríkislögreglustjóra. Þar birtast samskipti ríkislögreglustjóra (RLS) og rekstrarfélags Stjórnarráðsins (RFS) auk þess sem afrit voru í sumum tilvikum send til forsætisráðuneytisins og ríkissaksóknara.
Fram kemur að tölvupóstur sem sendur var á mig og látinn líta út fyrir að hann hefði komið frá öðrum en þeim sem sendi hann hefði líklega innihaldið þekkta tölvuveiru að nafni „Poison Ivy backdoor“. Um þá veiru segir í bréfi frá RFS: „Einkenni hennar eru þær að hún opnar bakdyr inn á tölvu viðkomandi fyrir aðgengi árásaraðila að tölvunni“. Þótt veiran hafi ekki fundist í tölvunni er tekið fram að „Algengt er með slíka veirur að árásaraðilinn hreinsar til eftir sjálfan sig að lokinni aðgerð“. Atvikið var skráð sem öryggisatvik hjá RFS.
Embætti ríkislögreglustjóra fylgdi málinu svo eftir og hafði samráð um það við ríkissaksóknara. Ástæða er til að taka fram að ekki er annað að sjá en að RLS hafi staðið mjög faglega að meðferð þessa máls og það er í samræmi við reynslu mína af embættinu sem forsætis- og dómsmálaráðherra.
Hér fylgir bréf frá ríkislögreglustjóra sem lýsir niðurstöðunni.
Athugasemdir