Segir að Birgitta hljóti að vera „ein af skipuleggjendunum“ á bak við aðför að Viðreisn og Bjartri framtíð

Hanna Katrín Frið­riks­son, þing­flokks­for­maður Við­reisnar, segir að stjórn­ar­and­staðan máli flokk­ana Viðreisn og Bjarta fram­tíð upp sem vilja­laus verk­færi Sjálf­stæð­is­flokks­ins. „Þú hlýtur að þekkja orð­ræð­una vegna þess að þú hlýtur að vera ein af skipu­leggj­end­unum,“ sagði hún við Birgittu Jóns­dóttur í umræðum á Alþingi í dag.

Birgitta Jóns­dóttir hafði gert að umtals­efni ummæli sem Hanna Katrín lét falla í Silfrinu um helg­ina. Hélt Hanna Katrín því fram að fylgis­tap Við­reisnar og Bjartrar fram­tíðar mætti meðal ann­ars rekja til þess að stjórn­ar­and­staðan hefði lagt áherslu á að „heim­færa góðu verkin upp á Sjálf­stæð­is­flokk­inn“ og að „gera hag hans mik­inn þarna og að sama skapi draga úr störfum hinna stjórn­ar­flokk­anna“.

Birgitta vitn­aði í pistil eftir blaða­mann­inn Atla Þór Fanndal þar sem rýnt er í ummæli Hönnu Katrínar og sam­starfs­flokkar Sjálf­stæð­is­flokks­ins gagn­rýndir fyrir að hafa gefið eftir helstu stefnu­mál sín. 

„Mig langar í ljósi þessa að spyrja hátt­virtan þing­mann hvað það sé nákvæm­lega sem við þing­menn stjórn­ar­and­stöð­unnar höfum gert til að ausa lofi á Sjálf­stæð­is­flokk­inn. Hvað ætlar hátt­virtur þing­maður að gera til að bregð­ast við því van­trausti sem hefur komið fram í skoð­ana­könn­unum und­an­farið, annað en að beina fingri að ein­hverjum öðrum?“ spurði Birgitta. 

Hanna Katrín þakk­aði Birgittu fyrir tæki­færið til að útskýra ummæli sín. „Þetta er rétt eftir mér haft. Mis­skiln­ing­ur­inn er hins vegar sá að ég var alls ekk­ert að kvarta. Þetta var bara við­ur­kenn­ing. Þetta er eins og að vera tekin úr umferð í hand­bolt­anum í gamla daga,“ sagði hún og tók fram að hún hefði aðeins nefnt þetta í fram­hjá­hlaupi í sjón­varps­þætt­inum. Þá taldi hún upp verk­efni sem rík­is­stjórnin væri að vinna að þökk sé Viðreisn, svo sem breyt­ingar á lagaum­hverfi mjólkur­iðn­að­ar­ins, end­ur­skoðun búvöru­samn­ings og inn­leið­ingu jafn­launa­vott­unar, og benti á að kjör­tíma­bilið væri ein­ungis nýfarið af stað. 

„Ætíð spyrt okkur við Sjálf­stæð­is­flokk­inn, 
sem litla bróður, sem litla valda­lausa aðil­ann,
að við höfum geng­ist honum á hönd“

„Öll þessi mál eru unnin með hags­muni almenn­ings að leið­ar­ljósi. Öll voru þau uppi á borð­inu í kosn­inga­bar­átt­unni,“ sagði Hanna Katrín. Á þessum tíma­punkti kall­aði Birgitta fram í fyrir henni og spurði hvort Viðreisn hefði verið kosin til að draga vagn Sjálf­stæð­is­flokks­ins. Hanna Katrín svar­aði: „Þið hafið enda­laust notið þess, svo ég svari því nú til, og það er ekki hægt annað en að fara bara í umræðu ykkar í fjöl­miðlum almennt, ætíð spyrt okkur við Sjálf­stæð­is­flokk­inn, sem litla bróður, sem litla valda­lausa aðil­ann, að við höfum geng­ist honum á hönd og svo fram­vegis. Þú hlýtur að þekkja orð­ræð­una vegna þess að þú hlýtur að vera ein af skipu­leggj­end­unum. En þannig er þetta.“