James K. Glassman, athafna­maður og pistla­höf­undur Wall Street Journal, segir að Bjarni Bene­dikts­son fjár­mála­ráð­herra saki sig rang­lega um að starfa fyrir vog­un­ar­sjóði. Þetta kemur fram í grein eftir Glassman sem birt­ist í tíma­rit­inu í gær.

Um er að ræða þriðju grein­ina í rit­deilu Glassm­ans og Bjarna sem hófst þegar Glassman líkti Íslandi við Argent­ínu vegna aðgerða stjórn­valda við losun fjár­magns­hafta og aflandskrón­u­út­boð. Sakaði Glassman Íslend­inga um þjösna­skap gagn­vart erlendum fjár­festum og aðför að rétt­ar­rík­inu. 

Bjarni brást skjótt við og svar­aði Glassman fullum hálsi. Hann rakti hvers vegna Ísland neydd­ist til að grípa til fjár­magns­hafta á sínum tíma og leiddi rök að því að sam­an­burð­ur­inn við Argent­ínu væri frá­leitur. Grein Bjarna má sjá í heild á vef fjár­mála­ráðu­neyt­is­ins.

Fram kemur í grein ráð­herra að und­an­farin ár hafi vog­un­ar­sjóðir „eins og skjól­stæð­ingar herra Glassm­ans“ keypt krónu­eignir af upp­haf­legum fjár­festum á miklum afslætti. 

„Það er eitt, og aðeins eitt líkt með Argent­ínu og Íslandi. Eftir efna­hags­hrunið í hvoru landi fyrir sig keyptu vog­un­ar­sjóðir eignir fyrir smá­aura. Þegar þeir verða fyrir von­brigðum með gróð­ann sem þeir fá út úr þessum við­skiptum fylgja greinar eftir tals­menn vog­un­ar­sjóða í kjöl­farið,“ segir í lok grein­ar­innar.

Í svar­grein Glassm­ans sem birt­ist í gær heldur hann fyrri mál­flutn­ingi sínum til streitu og bregst jafn­framt við þeim orðum Bjarna að vog­un­ar­sjóðir séu skjól­stæð­ingar hans. Segir hann ummæli Bjarna „full­kom­lega ósönn“ en mál­flutn­ing­inn þó „alveg eftir bók­inni“. Hér að neðan má sjá skjá­skot af pistl­inum:

Mynd: Skjáskot úr Wall Street Journal