Óttarr Proppé, formaður Bjartrar framtíðar, útskýrir hvers vegna viðræður um myndun hægri stjórnar með Sjálfstæðisflokki og Viðreisn gengu ekki eftir. 

Óttarr, sem hefur verið harðlega gagnrýndur fyrir að stefna á hægri stjórn, segir Bjarta framtíð hafa staðið fast á prinsippum. Stjórnarmaður í Bjartri framtíð sagði meðal annars að Óttarri hefði verið „úthúðað“ fyrir viðræðurnar.

„Það hefur verið vel þess virði að taka þátt í stjórnarmyndunarviðræðum til þess að reyna að ná saman um frjálslyndar áherslur og umbætur í íslensku samfélagi. Á endanum reyndist hugmyndin um að þjóðin fengi að greiða atkvæði um áframhald viðræðna við ESB annars vegar, og umbætur í kvótakerfinu hins vegar, of stór biti fyrir menn að kyngja. Björt framtíð hefur frá upphafi verið skýr um það að við erum tilbúin að axla ábyrgð til góðra verka en ekki lélegra. Við höfum staðið fast á þeim prinsipum og munu gera það áfram. Á endanum er það almannahagur sem skiptir máli. Ekkert annað. Ást og friður,“ skrifar Óttarr á Facebook.

Pawel Bartoszek, þingmaður Viðreisnar, hefur greint frá því að sjávarútvegsmálin hafi staðið helst í vegi fyrir myndun ríkisstjórnar með Sjálfstæðisflokki.

Sjálfstæðisflokkurinn neitar að fara markaðsleið í sjávarútvegi og bjóða upp aflaheimildir.