Margrét Frið­riks­dóttir frum­kvöðla­fræð­ingur, sem hefur látið mikið til sín taka í umræðu um inn­flytj­endur á Íslandi, segir að gefið hafi verið út skot­leyfi á kristna í íslensku sam­fé­lagi. Hún hyggst fara í mál við 365 miðla vegna meintrar afbök­unar á orðum hennar.

Margrét segir í sam­tali við Stundina að hún muni standa við þau orð sem hún lét falla í við­tali við Harma­geddon í morgun. Þar sagði hún að hún muni stefna 365 miðlum fyrir meið­yrði. Hún segir að fjöl­miðla­fyr­ir­tækið megi eiga von á stefnu frá sér á næstu miss­erum. „Það fer að koma að sum­ar­frí svo þetta gæti samt dreg­ist,“ segir Margrét. Hún seg­ist ætla láta lög­mann sinn um að ákveða hvaða bætur hún muni fara fram á. Margrét neitar að upp­lýsa hver lög­maður hennar er en full­yrðir þó að hann vinni nú hörðum höndum að stefnu hennar.

Telur orð sín afbökuð

 „Ég vil láta dæma svona lygar dauðar og ómerkar,“ segir Margrét. Að hennar sögn hafa orð hennar verið afbökuð af fjöl­miðlum og hefur það valdið henni miska, bæði vegna vinnu og í einka­lífi. Hún telur fjöl­miðlaum­fjöllun hafa skaðað hana í atvinnu­við­tölum. Hún seg­ist fyrst og fremst vera ósátt við að vera bendluð við sam­tökin PEGIDA. „Þessi sam­tök eru ekki til á Íslandi, svo hvernig get ég verið tals­kona þeirra?“ spyr Margrét.

Enn fremur sakar Margrét fjöl­miðlar um að hafa afbakað orð hennar svo hún líti út fyrir að and­stæð­ingur sam­kyn­hneigðra og múslima. „Þó ég bendi á stað­reyndir út í heimi, stað­reyndir frá Mið-Aust­ur­löndum og Evrópu, þá þýðir það ekki að sé á móti þeim. Það er fullt af múslima­löndum þar sem sam­kyn­hneigðir eru rétt­dræpir,“ segir Margrét.

Las upp stefnuskrá PEGIDA

Þrátt fyrir að Margrét vilji ekki tengja sig við sam­tökin PEGIDA þá hefur hún ítrekað mælt þeim bót í fjöl­miðlum. „Þetta eru ekki ras­ista­sam­tök. Þau und­ir­strika það að við viljum aðlag­ast. Þeir eru ekki á móti útlend­inga- eða inn­flytj­enda­stefnu og það er tekið sér­stak­lega fram [...] Þetta er mjög hóf­samt og eng­inn ras­ismi í þessu,“ var haft eftir henni í frétt Vísis 14. jan­úar síð­ast­lið­inn. Tveimur dögum síðar mætti Margrét í Bítið á Bylgj­unni og las upp þýdda stefnu­skrá PEGIDA. Facebook-síða PEGIDA á Íslandi er með ríf­lega 3.000 læk í dag.

Varnarbarátta meirihlutans

Rætt var við Margréti í síð­deg­is­út­varpi Útvarp Sögu í gær. Þar lýsti hún upp­lifun sinni af tíð­ar­and­anum.

„Það er bara búið að gefa út skot­leyfi á mann af því maður er krist­inn“

„Mér finnst eins og fólk hafi skot­leyfi. Það er bara búið að gefa út skot­leyfi á mann af því maður er krist­inn og við­ur­kennir að maður er krist­inn. Tíð­ar­and­inn er sá að fólki finnst í lagi að níð­ast á þannig fólki. [...] Ég er hætt að finna fyrir sam­kennd og náunga­kær­leik og að fólk skipt­ist yfir­vegað á skoð­unum. Þetta er eitt­hvað sem maður er far­inn að sakna. [...] Mér finnst tíð­ar­and­inn vera sá að meiri­hluta­hópar eiga að lúffa fyrir við­horfum minni­hluta­hópa til að mis­muna á grund­velli þess að við séum ekki að mis­muna minni­hluta­hóp­unum. Ég skil þetta ein­hvern veg­inn svo­leiðis. Hvað með rétt­indi meiri­hluta­fólks­ins?“ sagði Margrét á Útvarp Sögu í gær.

Margrét hefur áður kvartað undan því að mál­frelsi sé heft í umræðu um inn­flytj­endur og múslima. „Þegar heim­ur­inn er allur að vakna og Evr­ópu­löndin og þetta er orðin það mikil ógn í þessum löndum þar sem þessir inn­flytj­endur eru hvað mest að þá er við­bún­aður í nán­ast hverju þess­ara landa, þannig að þetta er mjög sér­kenni­legt að hér á Íslandi þá megi bara ekki tala um þessa ógn og þetta sé bara ein­hver islama­fóbía og fólk sé bara eitt­hvað ruglað sem leyfir sér að tala um þetta,“ sagði Margrét á Útvarpi sögu í des­em­ber síð­ast­liðnum.