Leitarhundar á vegum björgunarsveitanna hafa sýnt svæði við vegarslóða á Reykjanesi áhuga. Hundarnir eru þjálfaðir í að finna lykt af mannfólki á víðavangi og því hafa björgunarsveitarmenn einbeitt sér að þessu svæði í gærkvöldi og í dag. Nú á svæðinu eru leitarhundar sem eru sérþjálfaðir í sporaleit. Þeir hafa fengið að finna lykt af fatnaði Birnu og leita nú á svæðinu ásamt björgunarsveitarmönnum.

Rétt eftir klukkan sjö í gær sýndu leitarhundarnir svæðinu áhuga. Ákveðið var að leita á svæðinu eftir að lögreglu barst ábending um grunsamlegar ferðir á fáförnum vegslóða að morgni laugardagsins 14. janúar, eftir að slökkt hafði verið á iPhone-síma Birnu Brjánsdóttur klukkan 05:50.

„Þessi leit er í nágrenni við Keili en nokkuð snemma í rannsókn þessa máls þá fékk lögregla ábendingu um að bílljós hafi sést að morgni laugardagsins á skringilegum stað. Við höfum fylgt þeirri ábendingu eftir og í gærkvöldi varð sú framvinda við þá leit að það mátti merkja áhuga leitarhunda á ákveðnu svæði,“ segir Grímur Grímsson, yfirlögregluþjónn hjá lögreglunni á höfuðborgarsvæðinu.

Tæknideild lögreglunnar leitaði um borð í Polar Nanoq í nótt og var lagt hald á töluvert af munum sem Grímur segir að hafi haft áhrif á gang rannsóknarinnar. Samkvæmt heimildum Stundarinnar fór tæknideild lögreglunnar aftur um borð í togarann í dag og fundust þá vísbendingar sem lögreglan fylgir nú eftir í rannsókn sinni. Rannsókn á togaranum er enn ekki lokið og er hann í umsjá lögreglunnar.

Þá er tæknideild lögreglunnar er enn að skoða rauðan Kia Rio-bílaleigubíl frá Bílaleigu Akureyrar sem talið er að mennirnir hafi keyrt umrædda nótt sem Birna hvarf. Samkvæmt upplýsingum á vefsíðu bílaleigunnar er GPS-staðsetningartæki ekki staðalbúnaður í útleigu en Grímur segir lögreglu vera að skoða það hvort slíkt tæki hafi fylgt með rauða Kia Rio-bílaleigubílnum.

Þegar skipverjarnir þrír voru færðir á lögreglustöðina við Hverfisgötu var kallaður til hjúkrunarfræðingur sem tók blóðsýni úr mönnunum. Grímur segist ekki geta svarað því hvort þeir hafi verið undir áhrifum áfengis eða vímuefna, það sé hluti af rannsóknargögnum.

Uppfært 18:31 - Þriðja manninum hefur verið sleppt úr haldi.