„Í mínum huga er niðurlagssetningin í tilvitnuðum leiðara grafalvarleg í ljósi þess að ritstjórinn sem skrifar þessa herhvöt er jafnframt æðsti stjórnandi allrar 365 fjölmiðlasamsteypunnar sem er í eigu málsaðila dómsmála sem undirbúin hafa verið hjá því embætti sem spjótum skal nú beint að,“ segir Ögmundur Jónasson, þingmaður Vinstri grænna, í aðsendri grein í Fréttablaðinu í dag um leiðara sem Kristín Þorsteinsdóttir, aðalritstjóri 365, hefur skrifað í Fréttablaðið um dómstóla og dómsmál vegna meintra efnahagsbrota í aðdraganda efnahagshrunsins.  

„Í mínum huga er niðurlagssetningin í tilvitnuðum leiðara grafalvarleg“

Grein Ögmundar ber yfirskriftina „Ákall til fjölmiðla“ en í henni vísar hann sérstaklega til niðurlags leiðara Kristínar og beinir þeim tilmælum til fjölmiðla að þeir misfari ekki með vald sitt. Niðurlag leiðara Kristínar var: „Sérstakur saksóknari gegnir mikilvægu embætti. Hann hefur örlög fjölda manna í höndum sér. Hvaða skoðun sem fólk hefur á persónum og leikendum getum við vonandi öll sammælst um að tilgangurinn helgar ekki alltaf meðalið þegar örlög fólks eru í húfi. Það er nauðsynlegt að upplýsa hvort sérstakur saksóknari laug þegar hann sagðist ekki hafa vitað um tengsl Sverris og Ólafs Ólafssonar. Niðurstaða Hæstaréttar er óboðleg, og má ekki verða endahnútur þessa máls. Nú taka fjölmiðlar við.“

Jón Ásgeir Jóhannesson Eiginmaður aðaleiganda 365, og fyrrverandi aðaleigandi félagsins, er fyrir dómi vegna meintra efnahagsbrota. Á sama tíma skrifar aðalritstjóri blaðsins leiðara um að fjölmiðlar eigi að taka á málefnum Hæstaréttar. Hér sést Jón Ásgeir með verjanda sínum, Gesti Jónssyni. Gestur er mágur aðalritstjóra Fréttablaðsins.

Mynd: Pressphotos

Hagsmunatengsl eigenda 365

Í leiðara sínum 4. apríl síðastliðinn gerði Kristín vinnubrögð Hæstaréttar og Sérstaks saksóknara að umtalsefni. Hún endaði leiðarann á ákalli til fjölmiðla um að taka á málefnum dómsvaldsins: „Niðurstaða Hæstaréttar er óboðleg, og má ekki verða endahnútur þessa máls. Nú taka fjölmiðlar við.“

„Niðurstaða Hæstaréttar er óboðleg, og má ekki verða endahnútur þessa máls.“

Um þetta textabrot segir Ögmundur: „Í mínum huga er niðurlagssetningin í tilvitnuðum leiðara grafalvarleg í ljósi þess að ritstjórinn sem skrifar þessa herhvöt er jafnframt æðsti stjórnandi allrar 365 fjölmiðlasamsteypunnar sem er í eigu málsaðila dómsmála sem undirbúin hafa verið hjá því embætti sem spjótum skal nú beint að.“ 

Síðasti hlutinn í þessu textabroti Ögmundar vekur athygli í ljósi þess að málflutningur hófst í Aurum-málinu í Hæstarétti Íslands í gær en þar er Jón Ásgeir Jóhannesson, eiginmaður aðaleiganda fjölmiðlasamsteypunnar 365, fyrir dómi. Héraðsdómur Reykjavíkur sýknaði sakborningana í málinu en embætti sérstaks saksóknara áfrýjaði þeirri niðurstöðu til Hæstaréttar Íslands. 

Grein Ögmundar má lesa hér í heild sinni.

Greip inn í fréttaflutning

Kristín Þorsteinsdóttir var ráðin útgefandi 365 síðastliðið sumar. Síðasta haust tók hún einnig við stöðu aðalritstjóra 365. Ritstjórar Fréttablaðsins, Mikael Torfason og Ólafur Stephensen, létu af störfum eftir gagnrýni á vinnubrögð Kristínar. Fram kom að Kristín hefði gripið inn í fréttaflutning um samkeppnisaðila 365, með því að fjarlægja frétt af Vísi.is sem tengdist sjónvarpsstöðinni iSTV til að koma í veg fyrir að hún hlyti kynningu.

Ólafur Stephensen skrifaði sinn síðasta leiðara í Fréttablaðið um hættuna af áhrifavaldi eigenda á fjölmiðlaumfjallanir: „Siðareglur fjölmiðla skipta litlu sem engu máli ef vilji eigenda stendur ekki til þess í raun að starfrækja sjálfstæða miðla, þar sem ritstjórnin lýtur ekki eigendavaldi.“

„Siðareglur fjölmiðla skipta litlu sem engu máli“

Kristín Þorsteinsdóttir Áður en Kristín Þorsteinsdóttir, fyrrverandi upplýsingafulltrúi Baugs, var ráðin útgefandi og aðalritstjóri 365, hafði hún skrifað harðar greinar gegn rannsóknum á meintum efnahagsbrotum í aðdraganda hrunsins. Eitt viðfangsefni slíkra rannsókna er fyrrverandi aðaleigandi og eiginmaður núverandi aðaleiganda 365.

Mynd: Vísir.is

Áður en Kristín var ráðin ritstjóri og útgefandi hafði hún vakið athygli fyrir gagnrýni sína á rannsóknir á meintum brotum bankamanna og auðmanna í aðdraganda efnahagshrunsins. Þar sakaði hún Sérstakan saksóknara og dómstóla um fúsk og varaði við yfirvofandi „réttarmorðum“ í dómsmálunum.