„Góða fólkið“ eða „Gutmensch“ hefur verið valið óorð ársins 2015 í Þýskalandi, að mati dómnefndar þýskra málvísinda- og blaðamanna. Eins og dómnefndin kom að hefur orðið lengi verið í notkun, en fékk nýtt notkunargildi á síðasta ári, sérstaklega í samhengi við umræður um flóttamannamál.
„Með því að ásaka einhvern um að vera partur af „Góða fólkinu“ eru umburðarlyndi og hjálpsemi máluð upp sem heimska og barnaskapur.“
„Þeir sem fengu stimpilinn „Góða fólkið“ árið 2015 voru sérstaklega þeir sem vildu hjálpa flóttafólki og börðust gegn árásum á flóttamannabúðir“ segir í tilkynningunni. „Með því að ásaka einhvern um að vera partur af „Góða fólkinu“ eru umburðarlyndi og hjálpsemi máluð upp sem heimska og barnaskapur.“
Brautryðjandinn Elliði Vignisson
Hugtakið hefur mikið verið notað á Íslandi undanfarin misseri, og hófst almenn notkun þess með pistli sem Elliði Vignisson skrifaði í október árið 2014 með fyrirsögninni „„Góða fólkið“ og umræðan“. Þar uppnefnir Elliði þá sem gagnrýna Vigdísi Hauksdóttur, og segir m.a. varðandi umræður um innflytjendamál:
„Þeir sem ræða innflytjendamál og þá sérstaklega málefni hælisleitenda tipla á bæði hálum og þunnum ís. „Góða fólkið“ mætir allri slíkri umræðu með ásökunum um nasisma, rasisma og útlendingahatur.“
Var pistill Elliða mikið ræddur þegar hann birtist. Fékk hann bæði miklar undirtektir í ýmsum hópum, en margir hafa gagnrýnt Elliða, og bent á að með pistlinum hafi Elliði í raun lagst gegn þeim pól gagnrýninnar umræðu sem hann væri ósammála.
Hér er frétt Spiegel um málið, og hér má lesa pistil Elliða.
Athugasemdir