„Við erum virkilega þakklátir fyrir ykkur,“ sagði Aron Einar Gunnarson landsliðsfyrirliði á Ingólfstorgi, þar sem mannfjöldi fagnaði því að karlalandslið Íslands spilar á stórmóti í knattspyrnu í fyrsta sinn.
„Ég fokking elska þig,“ heyrðist áhorfandi hrópa til baka.
Karlalandslið Íslands spilar á Evrópumeistaramóti landsliða í knattspyrnu sem hefst 10. júní á næsta ári, eftir 0 - 0 jafntefli við Kasakstan á Laugardalsvelli.
Þetta er í fyrsta skipti sem íslenska karlalandsliðið spilar á stórmóti, en liðið varð naumlega af sæti á Heimsmeistaramótinu á síðasta ári eftir tap gegn Króatíu í seinni umspilsleik.
Fögnuðurinn vegna tíðindanna hefur yfirtekið samfélagsmiðla og fjölmiðla. Sigurhátíð á Ingólfstorgi í miðborg Reykjavíkur er haldin í kvöld.
Forseti Íslands sagði í samtali við mbl.is í kvöld að það væri „stórkostlegt“ að vera Íslendingur í dag. „Þetta er árangur svo margs í gegnum árin og íþróttirnar hafa alltaf sameinað þjóðina,“ sagði hann.
„Nú sé ég eftir því að hafa ekki verið búinn að tryggja forsætisráðherra vald til að gefa öllum frí með skömmum fyrirvara þegar tilefni er til.“
Sigmundur Davíð Gunnlaugsson forsætisráðherra segist sjá eftir að hafa ekki veitt sjálfum sér valdheimildir til boðunar á almennum frídegi. „Til hamingju með að upplifa einhvern stærsta dag íslenskrar-, ég meina evrópskrar-, íþróttasögu …til þessa! Nú sé ég eftir því að hafa ekki verið búinn að tryggja forsætisráðherra vald til að gefa öllum frí með skömmum fyrirvara þegar tilefni er til. Reyndar sagði ég landsliðsstrákunum eftir leikinn að allir veitinga- og skemmtistaðir yrðu opnir fyrir þá í nótt eins lengi og þeir vildu. Eftir á að hyggja hafði ég formlega séð líklega ekki vald til þess heldur ...en ég geri ekki ráð fyrir að neinn muni reyna að reka þá í háttinn.“
Svona er sigurinn - svona er Ingólfstorg - "var það ekki?"
Posted by Dagur B. Eggertsson on Sunday, September 6, 2015
Fögnuðurinn hefur smitast út í fréttamiðla. Fyrirsögn á fréttavefnum Kjarnanum var með óhefðbundnara sniði, en hún var: „JÁÁÁÁÁÁÁÁÁÁÁÁÁÁ!!!!!“
Yfirlýsing frá KSÍ einkennist af geðshræringu: „Við erum enn smám saman að átta okkur á þessu en við erum víst búin að tryggja okkur sæti á lokakeppni EM í Frakklandi næsta sumar. Leikmenn og allir sem koma að landsliðinum vilja byrja að þakka af auðmýkt fyrir stórkostlegan stuðning í undanförnum leikjum og það eiga ALLIR sinn hlut í velgengi liðsins og sætinu í Frakklandi. Við viljum sérstaklega þakka Stuðningssveitin Tólfan fyrir MAGNAÐAN stuðning og við viljum sjá sem flesta á vellinum komandi sumar í Frakklandi. Þið eruð bestu stuðningsmenn í heimi! TAKK FYRIR ALLT og ÁFRAM ÍSLAND!“
Nú stendur yfir fögnuður á Ingólfstorgi með landsliðsmönnunum.
Athugasemdir