Kvartaði undan kókneyslu Indverja   

Bæring er fæddur á Patreksfirði 22. nóvember 1955. Á yngri árum starfaði hann meðal annars við sjómennsku, í byggingariðnaði og sölumennsku. Árið 1984 fluttist hann til Oregon og stundaði þar nám í viðskiptafræði við University of Oregon til 1987. Hann er fyrrverandi forstjóri og framkvæmdastjóri hjá Coca Cola International og var um hríð við stjórn markaðs- og söluaðgerða Coca Cola í Indlandi. 

Bæring talaði um það í viðtali við Morgunblaðið að honum þætti Indlandsmarkaðurinn mjög frábrugðinn þeim íslenska því Indverjar drekka „að jafnaði ekki nema 23 flöskur á ári“. Hann segir að forseti Íslands eigi að vera óháður stjórnmálaöflum og hagsmunasamtökum til að hann geti tekið sjálfstæðar ákvarðanir sem varða hagsmuni þjóðarinnar. 

Bæring er giftur Rose Olafsson bæjarstjóra, sem er frá Filippseyjum, og á sex börn og sex barnabörn.

Gleymdi að flytja lögheimilið 

Guðmundur Franklín er fæddur þann 23. október árið 1963. Hann er viðskiptafræðingur og löggiltur verðbréfasali að mennt. Hann var fyrsti íslenski verðbréfamiðlarinn á Wall Street og var þar í á annan áratug. 

Guðmundur stofnaði flokkinn Hægri græna, sem bauð fram í síðustu þingkosningunum. Skömmu fyrir kosningar kom í ljós að Guðmundur var enn með lögheimili erlendis. Hann flutti það of seint og var ekki kjörgengur. 

Guðmundur stofnaði Burnham International á Íslandi og var liður í því kaup á fyrirtækinu Handsali. Árið 2002 var félagið úrskurðað gjaldþrota og töpuðu margir umtalsverðum fjárhæðum. Kröfur í þrotabúið voru um fjögur hundruð milljónir króna. Eigendur Burnham á Íslandi voru í milljónaábyrgðum fyrir félagið. Guðmundur Franklín er fráskilinn.

Kynnti umdeilda stefnu Viðskiptaráðs 

Halla fæddist í Reykjavík 11. október 1968. Hún lauk BS-prófi í viðskiptafræði frá Auburn University og MBA-prófi frá Thunderbird University í Bandaríkjunum með áherslu á alþjóðleg samskipti og tungumál. Hún leiddi verkefnið Auður í krafti kvenna og gegndi starfi framkvæmdastjóra Viðskiptaráðs Íslands 2006 til 2007 áður en hún stofnaði fjárfestingasjóðinn Auði Capital. 

Þann 7. febrúar 2007 kynnti Halla umdeilda stefnuskrá á Viðskiptaþingi sem bar heitið: „Hvernig verður Ísland best í heimi?“ Þar var lögð áhersla á frjálst atvinnulíf og mælir Halla meðal annars með því að „höftum og íþyngjandi reglum verði aflétt af öllum atvinnuvegum og viðskiptalífinu verði í auknum mæli gefinn kostur á að setja sér sjálft reglur“.  Einnig að „tollar, vörugjöld og sértækir skattar verði afnumdir“. Í stefnuskránni er einnig stefnt á að skólakerfið verið einkavætt, en ríkið „haldi áfram að fjármagna menntun á leik-, grunn og framhaldsskólastigi“. Þá verði ráðuneytum og stofnunum fækkað og náttúruauðlindir verði í auknum mæli í einkaeigu og nýttar á skynsamlegan máta svo þeirra verði notið af framtíðarkynslóðum. 

Halla er gift Birni Skúlasyni. Þau búa á Kársnesinu í Kópavogi og eiga tvö börn.

Talar um einelti og tilfinningar  

Heimir Örn er fæddur árið 1980. Hann er rafmagnstæknifræðingur með meistaragráðu í verkefnastjórnun. Hann starfar sem áreiðanleikasérfræðingur hjá Icelandair og hefur verið í samninganefndum fyrir ýmis stéttarfélög sem samið hafa við ríkið og Samtök atvinnulífsins, auk þess sem hann er í stjórn Tæknifræðingafélags Íslands. 

Heimir Örn var í Borgarahreyfingunni og bauð sig fram árið 2009, en margir stuðningsmenn hennar lýstu yfir vantrausti á Hreyfingunni þegar hún tók við 28 milljóna fjárupphæð sem skráðum stjórnmálaflokkum ber að fá. Fulltrúar Hreyfingarinnar höfðu áður sagst ætla að leggja hana niður eftir að þeir kæmust á stjórnlagaþing. 

Heimir segir mikilvægt að „allar íþróttir“ hafi „jafnan aðgang að forsetanum til hvatninga“. Á vefsíðu tileinkaðri framboði hans, XHeimir, talar hann um einelti, meðal annars eigin upplifun, og tilfinningar karlmanna. Hann segir að kosingabarátta hans eigi eftir að verða „lífleg“. 

Heimir er giftur Þórunni Karólínu Pétursdóttur og saman eiga þau þrjú börn.

Alltaf ætlað að verða forseti 

Hrannar er fæddur 5. ágúst 1973 á Húsavík. Hann lauk stúdentsprófi frá Verzlunarskóla Íslands 1993 og BA-prófi í félagsfræði frá Háskóla Íslands 1996. Eftir að námi lauk starfaði Hrannar eitt sumar á Bylgjunni og síðan hjá Sjónvarpinu sem fastráðinn fréttamaður. Hann var framkvæmdastjóri mannauðs-, markaðs- og lögfræðimála hjá Vodafone auk þess sem hann var talsmaður fyrirtækisins. 

Undanfarin misseri hefur Hrannar starfað sjálfstætt og veitt fyrirtækjum og stofnunum ráðgjöf á sviði upplýsinga- og samskiptamála, þar með talið Stjórnarráði Íslands. 

Þegar Hrannar tilkynnti framboð sitt sagði Margrét, kona hans, að metnaður hans hafi fljótt komið í ljós: „Þegar við Hrannar vorum að byrja að hittast sagði hann mér að hann ætlaði að verða forseti og spurði hvort ég væri til í að taka það atriði með honum. Það var ekki fyrr en leið á sambandið að ég áttaði mig á því að hann ætlaði í alvörunni að gera þetta og hingað erum við komin.“

Hrannar er giftur Margréti Arnardóttur. Þau búa í Reykjavík og eiga saman fjögur börn. 

Vill sýna hugrekki og tala upphátt  

Vigfús Bjarni er fæddur árið 1975. Hann lauk cand. theol. prófi frá HÍ 2001. Þá stundaði hann framhaldsnám í sálgæslu og lauk meistaranámi í kennimannlegri guðfræði með áherslu á sálgæslu frá Luther Seminary 2003. Vigfús hefur verið sjúkrahúsprestur við Landspítala háskólasjúkrahús frá árinu 2005 og starfar á Barnaspítala Hringsins og BUGL. Vigfús hefur haldið fyrirlestra hér heima sem og námskeið tengd sálgæslu hjá Endurmenntun Háskólans. 

Vigfús Bjarni segist fylgjandi því að ákveðið hlutfall kjósenda geti krafist þjóðaratkvæðagreiðslu, meðal annars í tengslum við nýja stjórnarskrá, en þá yrði það ekki á borði forsetans. 

Fram að tvítugu starfaði Vigfús Bjarni með Sambandi ungra sjálfstæðismanna. Hann segir það ekki skipta máli hvort forsetinn sé trúaður eða ekki. Hann telur undirskriftaframtak Kára Stefánssonar merkilegt og segist hafa „hugrekki til að ganga inn í þessar aðstæður og tala upphátt“. Einnig segir hann að forsetaembættið eigi að minna á það sem sé sameiginlegt í þjóðarsálinni - dugnað, þrautseigju og sköpunargáfu. 

Boraði fingrunum í Biblíuna  

Mynd: Kristinn Magnússon

Guðrún Margrét er fædd árið 1959. Hún er hjúkrunafræðingur að mennt og einn af stofnendum hjálparsamtakanna ABC-barnahjálp. Hún hefur unnið mikið í sjálfboðavinnu síðan að hún stofnaði samtökin og hefur ferðast víðsvegar um heiminn, meðal annars til að kenna börnum í vanþróuðum ríkjum að lesa og skrifa. Guðrún varð kristin þegar hún var 13 ára gömul og eru hjálparsamtökin byggð á kristnum gildum. 

Á framboðsfundi þar sem Guðrún tilkynnti um framboð sagðist Guðrún hafa „borað fingrum í Biblíuna“ þegar hún var að velta fyr­ir sér fram­boðinu og að upp hafi komið hvert versið á fæt­ur öðru sem staðfesti fyr­ir henni og sann­færði um að hún ætti að sækj­ast eft­ir embætt­inu.

Guðrún Margrét var í viðtali hjá Stundinni í sumar í kjölfar þess að þrír íslenskir stjórnarmenn, þar á meðal hún sjálf, voru reknir úr stjórn ABC samtakanna í Keníu eftir deilur þar innanborðs. Þórunn Helgadóttir, formaður ABC samtakanna í Keníu, var sökuð um tilraun til þess að sölsa undir sig félagið og eignir þess. 

Þau hafa einnig tilkynnt framboð: