Formaður kjararáðs, Jónas Þór Guðmundsson, hefur verið mjög virkur í starfi Sjálfstæðisflokksins í mörg ár. Varaformaðurinn, Óskar Bergsson, var oddviti Framsóknar í borginni og státar sig af því að hafa virkjað Sigmundi Davíð í starf Framsóknarflokksins.
Jónas Þór Guðmundsson, lögmaður og stjórnarformaður Landsvirkjunar, er núverandi formaður kjararáðs. Jónas hefur lengi verið virkur í starfi Sjálfstæðisflokksins. Hann sat í stjórn Stefnis, félags ungra sjálfstæðismanna í Hafnarfirði í fjögur ár, 1994-98, og var formaður í eitt ár, 1996-97. Þá var hann jafnframt varaformaður Sambands ungra sjálfstæðismanna (SUS) undir formennsku Ásdísar Höllu Bragadóttur á árunum 1997-99. 
Hann bauð sig fram til formanns SUS á sambandsþingi sem fram fór í Vestmannaeyjum árið 1999. Þar tapaði hann fyrir Sigurði Kára Kristjánssyni, sem síðar var þingmaður og nú, eins og Jónas Þór, starfandi lögmaður. Sigurður Kári fékk 211 atkvæði en Jónas Þór 143 atkvæði. Jónas var kosinn af Alþingi til þess að gegna formennsku kjararáðs.
Varaformaðurinn ber ábyrgð á Sigmundi Davíð
Óskar Bergsson, varaformaður kjararáðs, starfar sem fasteignasali. Hann var hinsvegar lengi virkur í starfi Framsóknar og var meðal annars oddviti flokksins í borginni. Hann tók við forystuhlutverki framsóknar í borgarstjórn eftir að Björn Ingi Hrafnsson dró sig í hlé, myndaði meirihluta með Hönnu Birnu Kristjánsdóttur og Sjálfstæðisflokknum og virkjaði ungan skipulaghagfræðing í flokksstarf Framsóknarflokksins en sú ráðstöfun átti eftir að verða afdrifarík.
„Sá ungi maður hét og heitir Sigmundur Davíð Gunnlaugsson og er nú formaður Framsóknarflokksins sem er að verða sá stærsti í landinu,“ segir Óskar Bergsson – fasteignasali á fasteignasölunni Torgi. 
Hinir aðalmennirnir í kjararáði eru: Svanhildur Kaaber, fyrrum varaþingkona Alþýðubandalagsins, fyrrum framkvæmdastjóri Vinstrihreyfingarinnar græns framboðs, þingflokks VG og fyrrum formaður kjararáðs, Vilhjálmur H. Vilhjálmsson, lögmaður sem skipaður er af Hæstarétti og Hulda Árnadóttir, sem skipuð var af Bjarna Benediktssyni, fjármála- og efnahagsráðherra. Er hún meðal annars þekkt fyrir að gæta hagsmuna Þóreyjar Vilhjálmsdóttur í lekamálinu.
Birgitta og Dagur B afþakka launahækkun
Laun borgarfulltrúa taka mið af þingfararkaupi og hækka því laun þeirra við þessa hækkun kjararáðs. Í athugasemd við færslu Dags B. Eggertssonar borgarstjóra á Facebook segist hann ætla að lækka laun sín einhliða aðhafist Alþingi ekkert í málinu. Birgitta Jónsdóttir, pírati, gagnrýnir hækkunirnar einnig harðlega og segist nú þegar hafa hringt niður á Alþingi til þess að kanna hvort hún geti afþakkað launahækkunina.
Kjararáð skipast svo:
Aðalmenn:
Jónas Þór Guðmundsson, formaður, kosinn af Alþingi
Óskar Bergsson, varaformaður, kosinn af Alþingi
Svanhildur Kaaber, kosin af Alþingi
Vilhjálmur H. Vilhjálmsson, skipaður af Hæstarétti
Hulda Árnadóttir, skipuð af Bjarna Benediktssyni, fjármála- og efnahagsráðherra
Varamenn:
Eva Dís Pálmadóttir, kosin af Alþingi
Örlygur Hnefill Jónsson, kosinn af Alþingi
Ingibjörg Ingadóttir, kosin af Alþingi
Berglind Svavarsdóttir, lögmaður, skipuð af Hæstarétti
Þórlindur Kjartansson, skipaður af skipuð af Bjarna Benediktssyni, fjármála- og efnahagsráðherra
Athugasemdir