Kolbeinn Óttarsson Proppé, þingmaður Vinstri grænna, er afar harðorður í garð Benedikts Jóhannessonar, fjármála- og efnahagsráðherra, eftir að Benedikt játaði að hafa gefið Alþingi röng svör um áhuga fjárfesta á Keflavíkurflugvelli og samskipti ráðuneytisins við þá.
Líkt og Stundin greindi frá í morgun hefur Benedikt viðurkennt að hafa gefið ónákvæm, jafnvel röng, svör þegar hann var spurður út í áhuga fjárfesta á Keflavíkurflugvelli á Alþingi í síðasta mánuði. Benedikt átti sjálfur fund með fjárfestum tæpum tveimur mánuðum áður en fyrirspurnin var borin upp og í framhaldinu átti aðstoðarmaður hans annan fund með þeim, sama dag og fyrirspurn var borin upp á Alþingi. Benedikt segist ekki hafa vitað af fundinum.
Benedikt greindi sjálfur frá málinu á Facebook í morgun eftir að Stundin hefði spurt hann um málið.
„Málið er grafalvarlegt og enn eitt dæmið um það sem mér finnst vera lenska hjá núverandi ríkisstjórn; sumsé vanvirðing gagnvart Alþingi,“ skrifar Kolbeinn meðal annars í pistli sem hann birti á Facebook síðu sinni rétt í þessu. Þá rifjar hann einnig upp þegar Björt Ólafsdóttir umhverfisráðherra fór með rangt mál á Alþingi um að hún hefði gefið nefnd um veitingu ívilnana ákveðin tilmæli, og Stundin fjallaði um. „Og líkt og Benedikt nú, taldi Björt enga ástæðu til að leiðrétta orð sín þar sem þau féllu; nefnilega í þingsal,“ segir Kolbeinn.
Þá gefur hann lítið fyrir útskýringar Benedikts um að honum hafi ekki verið kunnugt um fund Gylfa Ólafssonar, aðstoðarmanns ráðherra, með fjárfestunum, enda hafi miklar annir á síðustu dögum þingsins.
„En hvernig bregst ráðherra síðan við þegar hann gerir sér grein fyrir því að hann hefur sagt þinginu ósatt? Verðum við ekki að vænta þess að aðstoðarmaðurinn hafi stokkið til og látið ráðherra vita að svar hans hafi ekki verið alveg sannleikanum samkvæmt og m.a.s. hafi átt sér stað fundur sama dag og fyrirspurnin kom fram?
„Hann þegir þunnu hljóði þar til Stundin hefur samband við hann og spyr hann út í málið.“
Einhver hefði nú haldið að fulltrúi nýrra stjórnmála mundi þá stíga strax fram, hringja jafnvel í fyrirspyrjandann, kveða sér síðan hljóðs á þingi sem utan til að leiðrétta sjálfan sig. En ekki Benedikt. Hann þegir þunnu hljóði þar til Stundin hefur samband við hann og spyr hann út í málið. Þá setur hann fram status á Feisbúkk og biðst forláts.
Afsökunarbeiðnir verða að vera einlægar til að hægt sé að taka mark á þeim. Það að klóra sig út úr vandræðum af því að fjölmiðill var að fara að koma upp um þig, er ekki einlægni. Það er yfirklór.“
Hér að neðan er pistill Kolbeins í heild:
Nú hefur komið í ljós að Benedikt Jóhanesson fjármálaráðherra sagði Alþingi ósatt þegar hann svaraði fyrirspurn varaþingmanns Vinstri grænna, Óla Halldórssonar, um áhuga erlendra fjárfesta á kaupum á alþjóðaflugstöðinni í Keflavík. Stundin greinir frá þessu og orðaskipti þingmannsins og ráðherrans má sjá hér.
Málið er grafalvarlegt og enn eitt dæmið um það sem mér finnst vera lenska hjá núverandi ríkisstjórn; sumsé vanvirðing gagnvart Alþingi. Skemmst er að minnast þess þegar Björt Ólafsdóttir umhverfisráðherra sagði Alþingi ósatt um að hún hefði gefið nefnd um veitingu ívilnana ákveðin tilmæli. Það reyndist rangt, eins og Stundin greindi frá. Og líkt og Benedikt nú, taldi Björt enga ástæðu til að leiðrétta orð sín þar sem þau féllu; nefnilega í þingsal.
Það verða nægir um að rekja málið og fara ofan í saumana á ósannindum Benedikts. Telji einhver að ég grípi of sterkt til orða með því að kalla þetta ósanndini, þá vitna ég bara í ráðherra sjálfan sem sagði á Feisbúkk: „Síðar hefur mér orðið ljóst að svar mitt var ónákvæmt og jafnvel rangt…“. Mig langar hins vegar að beina sjónum að viðbrögðum og skýringum ráðherra.
Benedikt heldur því fram að hann hafi einfaldlega ekki vitað af því að aðstoðarmaður hans hefði fundað með fjárfestum vegna Keflavíkurflugvallar. Ljótt er ef satt er, segi ég nú bara, og ráðherra hlýtur að velta því fyrir sér hvort hann eigi að hafa fólk í vinnu sem situr á fundum um jafn stór málefni og þetta án þess að láta hann vita. Í hvers umboði fundaði aðstoðarmaðurinn með fjárfestunum? Sem einstaklingurinn Gylfi Ólafsson, eða sem aðstoðarmaður fjármálaráðherra Íslands?
Möguleg sala á flugvellinum hefur verið mikið í umræðunni, um þetta hefur verið rætt innan sem utan þings, en það virðist hafa farið algjörlega framhjá fjármálaráðherra, sem ber hæfni hans til starfans reyndar ekki gott vitni.
Gefum ráðherra orðið:
Þess má svo geta að þann 31. maí, sama dag og fyrirspurnin var borin upp átti Gylfi Ólafsson aðstoðarmaður minn annan fund með þessum aðilum um sama efni. Um þetta vissi ég ekki þá, enda miklar annir á síðustu dögum þingsins.
Annir á síðustu dögum þingsins? Er það afsökunin fyrir því að ráðherra viti ekki um fundi með áhugasömum kaupendum á flugstöðinni? Kannski þarf bara nýjan ráðherra sem nær að halda betri yfirsýn yfir verkefni ráðuneytisins.
En hvernig bregst ráðherra síðan við þegar hann gerir sér grein fyrir því að hann hefur sagt þinginu ósatt? Verðum við ekki að vænta þess að aðstoðarmaðurinn hafi stokkið til og látið ráðherra vita að svar hans hafi ekki verið alveg sannleikanum samkvæmt og m.a.s. hafi átt sér stað fundur sama dag og fyrirspurnin kom fram?
Einhver hefði nú haldið að fulltrúi nýrra stjórnmála mundi þá stíga strax fram, hringja jafnvel í fyrirspyrjandann, kveða sér síðan hljóðs á þingi sem utan til að leiðrétta sjálfan sig. En ekki Benedikt. Hann þegir þunnu hljóði þar til Stundin hefur samband við hann og spyr hann út í málið. Þá setur hann fram status á Feisbúkk og biðst forláts.
Afsökunarbeiðnir verða að vera einlægar til að hægt sé að taka mark á þeim. Það að klóra sig út úr vandræðum af því að fjölmiðill var að fara að koma upp um þig, er ekki einlægni. Það er yfirklór.
Fjármálaráðherra sagði Alþingi ósatt og ákvað svo að þegja yfir því þar til upp um hann komst.
Athugasemdir