Theodóra S. Þorsteinsdóttir, þingflokksformaður Bjartrar framtíðar, er óánægð með að vitnað hafi verið í þingræðu hennar í óundirbúnum fyrirspurnartíma á Alþingi þegar Logi Einarsson beindi spurningu til Óttars Proppé heilbrigðisráðherra og formanns Bjartrar framtíðar.

Theodóra átaldi Loga fyrir þetta í ræðu undir liðnum störf þingsins í gær og sakaði hann um að hafa verið að „spyrja aðra út úr“ sinni ræðu. 

„Mér finnst ekki mikil prúðmennska falin í því að spyrja aðra út úr minni ræðu þegar ég var sjálf í húsi og tiltæk til að svara spurningum þingmannsins. Ég veit ekki hvað hv. þm. Loga Einarssyni gengur til með svona háttalagi og ég vona svo sannarlega að það sé ekki til marks um þau vinnubrögð sem hann eða aðrir þeir sem ekki eiga sæti í ríkisstjórn að þessu sinni ætla að ástunda,“ sagði Theodóra. 

Þingræða Loga, sem Theodóra vísaði til, hljóðaði svo:

„Frú forseti. Í nokkrum ræðum á Alþingi í gær var fjallað töluvert um vinnubrögð og ný vinnubrögð. Menn töluðu um að byggja brýr. Mér fannst þetta málflutningur sem var vert að taka mark á. Og að menn ynnu þvert á meiri hluta og minni hluta. Ein af þeim sem flutti ágæta ræðu var þingmaður og formaður þingflokks Bjartrar framtíðar, hv. þm. Theodóra S. Þorsteinsdóttir. Hún sagði, með leyfi forseta: „Í mínum huga eru þingmenn og stjórnmálaflokkar ekki annaðhvort með eða á móti. Við erum ekki við og þið. Við erum öll í sama liði. Okkur var falið mikilvægt verkefni þar sem hagsmunir þjóðarinnar liggja undir, ekki hagsmunir stjórnmálaflokka eða okkar þingmanna. Mörg þeirra verkefna sem finna má í stefnuyfirlýsingu og í þeim þingmálum sem lögð verða fram á vorþingi eru mál sem allir flokkar lögðu ríka áherslu á í aðdraganda kosninga. Nú mun reyna á það hvort þeim flokkum sem ekki eiga aðild að núverandi ríkisstjórn var alvara með þeim yfirlýsingum um að vinnubrögð í stjórnmálum þörfnuðust yfirhalningar.“ Þess vegna langar mig að spyrja hæstv. heilbrigðisráðherra hvort sá ásetningur gildi líka um þá þingmenn sem tilheyra stjórnarmeirihluta Bjartrar framtíðar, þ.e. að standa við kosningaloforð. Ég er þó einkum að kalla eftir því hvernig þingmenn Bjartrar framtíðar munu nálgast tillögur og frumvörp sem munu koma fram frá stjórnarandstöðunni og eru í samræmi við áherslumál þess flokks í aðdraganda kosninga. Ég get nefnt frumvarp um greiðsluþátttöku sjúklinga sem mun koma fram, um áframhaldandi vinnu við gerð stjórnarskrár í samræmi við niðurstöður stjórnlagaráðs, að þjóðin fái sjálf að ákveða áframhaldandi ESB-viðræður og kerfisbreytingar í sjávarútvegi. Hin spurningin er svo: Eru þingmenn Bjartrar framtíðar bundnir á einhvern hátt í stjórnarsamstarfinu til að greiða atkvæði gegn gefnum loforðum eða með teknu tilliti til hvenær tillögur koma fram?“

Finnst tilvitnunin skrítin

Theodóra telur að málflutningur Loga hafi verið óeðlilegur. „Háttvirtur þingmaður Logi Már Einarsson kom hér í pontu í gær og gerði að umtalsefni orð sem ég lét falla í umræðu um stefnuræðu forsætisráðherra í fyrrakvöld. Það skrýtna var að hann beindi fyrirspurn sinni að virðulegum heilbrigðisráðherra,“ sagði hún í umræðum undir liðnum störf þingsins í gær. Sem kunnugt er sitja einungis ráðherrar en ekki óbreyttir þingmenn fyrir svörum í óundirbúnum fyrirspurnartímum.  

Oddný Harðardóttir, þingkona Samfylkingarinnar, gerir málið að umtalsefni á Facebook. „Þingflokksformaður Bjartrar framtíðar kvartar undan því á Alþingi að formaður flokksins sé spurður út í kosningaloforð og efndir þeirra. Hún kallar það slæm vinnubrögð. Ég skil ekkert lengur í þessu tali BF um vinnubrögð,“ skrifar hún. 

Theodóra svarar á þessa leið: „Engan vegin að kvarta undan að við séum spurð út í kosningaáherslur, enda erum við búin að svara þeim. Athugasemd mín snýr að því að vitna í mína ræðu og mín orð og spyrja aðra í BF út í þau, þar sem ég hef ekki tækifæri til þess að svara. Sér í lagi þar sem ég var að fjalla um hvernig ég vil vinna "Í mínum huga" hófst það sem Logi hefur eftir mér og spyr Óttarr útí. Ég er bundin af minni sannfæringu, það ætti enginn annar að svara fyrir hana.“

Aðspurð hvort henni finnist í alvörunni óeðlilegt að vitnað sé í orð þingmanns Bjartrar framtíðar í fyrirspurn til formanns Bjartrar framtíðar skrifar Theodóra:

„Ef ykkur finnst þetta góður bragur og eðlilegt þá virði ég það. Mér finnst það hins vegar mjög óeðlilegt og leyfi mér að minnast á það.“