Meira en 10 vikur eru liðnar síðan Bjarni Benediktsson fjármála- og efnahagsráðherra var beðinn um að greina Alþingi frá því hvort gert hefði verið verðmat á Borgun áður en eignarhlutur Landsbankans í fyrirtækinu var seldur. Enn hefur fyrirspurnin, sem Kristján L. Möller þingmaður Samfylkingarinnar lagði fram, ekki verið tekin á dagskrá. Kristján vakti athygli á þessu í umræðum undir liðnum fundarstjórn forseta í dag. Sagðist hann hafa skrifað forseta Alþingis bréf og óskað eftir liðsinni við að fá svör frá ráðherra um málið. „Hvað er verið að fela? Er eitthvað óþægilegt og gruggugt í þessu máli sem þolir ekki dagsljósið?“ sagði Kristján og bætti við: „Ég tek eftir því að hæstvirtur fjármálaráðherra verður dálítið órólegur í hvert skipti sem minnst er á þetta mál sem styður mig í þeirri trú að það sé eitthvað óeðlilegt við þetta mál.“