Aðgangur almennings var takmaður verulega og nær allur Austurvöllur afgirtur á meðan þjóðhátíðardagskrá fór fram við styttuna af Jóni Sigurðssyni í dag.
Gripið var til þessara ráðstafana vegna mótmælanna sem haldin voru á þjóðhátíðardaginn í fyrra þegar þáverandi forsætisráðherra, Sigmundur Davíð Gunnlaugsson, þurfti að flytja hátíðarræðu sína undir bumbuslætti, hrópum og köllum.
Haft er eftir Sigurði Inga Jóhannssyni forsætisráðherra á Mbl.is að forsætisráðuneytið hafi ekki komið að þeirri ákvörðun að stækka hið afgirta svæði, heldur einungis þjóðhátíðarnefnd Reykjavíkurborgar og lögreglan.
Þórgnýr Thoroddsen, formaður þjóðhátíðarnefndar, bendir hins vegar á að nefndin komi ekki að ákvörðunum um öryggisráðstafanir og innan hennar hafi engin umræða farið fram um öryggisgæsluna.
„Þessi umræða fór hvorki fram innan þjóðhátíðarnefndar né er þessi ákvörðun á hendi hennar. Nefndin sér einvörðungu um skipulagningu athafnarinnar fyrir hönd forsætisráðuneytisins og öryggisráðstafanir eru teknar af lögreglu,“ skrifar Þórgnýr á Facebook.
Að sama skapi segir Sóley Tómasdóttir, forseti borgarstjórnar, að borgin hafi ekki óskað eftir girðingunum. „Þvert á móti eru þessar meintu öryggisráðstafanir okkur þvert um geð,“ skrifar hún.
Þá er haft eftir Ágústi Svanssyni, aðalvarðstjóra lögreglu sem hafði yfirumsjón með öryggisgæslunni á Austurvelli, í viðtali á Vísi.is að lögreglan hafi ekki komið nálægt þeirri ákvörðun að stækka hið afgirta svæði „öðruvísi en að tryggja öryggi að beiðni forsætisráðuneytisins og Alþingis“.
Þjóðhátíð
Heimafólk sló velferðarskjaldborg um gesti þjóðhátíðar
Myndband sýnir sturlað veður á Þjóðhátíð í gær
Spennan magnast á leiðinni á Þjóðhátíð
Helgi Björns í kröppum dansi í Landeyjahöfn þegar kríur réðust að honum
Þjóðhátíðarnefnd ákveðin að halda hátíðina síðar í sumar
Athugasemdir