Albönsk kona sem gengin er 36 vikur á leið og var send úr landi í gærmorgun er mjög verkjuð og leiðinni á spítala í Albaníu. „Mér líður ekki vel eins og er og er á leiðinni á spítala,“ segir hún í samtali við Stundina. Hún kom til heimalandsins Albaníu seint í gærkvöldi eftir nítján tíma ferðalag en læknir á kvennadeild Landspítalans hafði mælt gegn því að hún færi í langt flug þar sem hún væri að glíma við stoðkerfisvandamál.

Leitar fregnaMorgane Priet Maheo hjá samtökunum Réttur barna á flótta og vinkona albönsku konunnar, hefur reynt að fá fregnir af henni síðastliðinn sólarhring.

Morgane Priet Maheo hjá samtökunum Réttur barna á flótta og vinkona albönsku konunnar, hefur áhyggjur af heilsu hennar. Konan átti sitt fyrra barn á 36. viku meðgöngu með keisaraskurði. „Ég var að hringja til þess að reyna að ná sambandi við hana vegna þess að ég er með smá áhyggjur. Ég er bara að reyna að fá fréttir,“ sagði Morgane í samtali við Stundina í gær, en þá hafði hún allan daginn reynt að fá fregnir af því hvar konan væri niðurkomin og hver staða hennar væri.

Hringdi hún meðal annars ítrekað í síma konunnar í þessum tilgangi. Eftir nokkrar hringingar svaraði hinsvegar maður sem hafði verið nágranni hennar á gistiheimilinu þar sem hún hafði haldið til ásamt unnusta sínum og barni. „Hann sagði að hún hefði skilið símann sinn eftir,“ sagði Morgane sem á erfitt með að átta sig á því hversvegna hún hafi ákveðið að  taka símann ekki með sér. „Hún skildi símann sinn eftir á hótelinu, sem er skrítið, þar sem hún er með fullt af myndum inni í símanum,“ segir Morgane. 

Reyndi að fá fréttir

Íslenskir lögreglumenn úr stoðdeild Ríkislögreglustjóra fylgdu konunni, sem er gengin 36 vikur á leið, úr landi í gærmorgun með flugvél Icelandair, ásamt unnusta hennar og tveggja ára barni. Ekki var tekið tillit til vottorðs frá lækni á kvennadeild Landspítalans þar sem fram kom að hún væri slæm af stoðkerfisverkjum og gæti átt erfitt með langt flug. Sjónarvottar á vegum No Borders samtakanna og samtökunum Réttur barna á flótta fengu ekki að vera viðstaddir á meðan fólkið pakkaði niður í töskur í fylgd lögreglumanna.

Morgane fór með konunni í skoðun hjá Mæðravernd á mánudagskvöld en var hinsvegar ekki viðstödd þegar lögreglumenn tóku fjölskylduna af gistiheimilinu þar sem þau höfðu haldið til síðastliðin mánuð. Hún reyndi í allan gærdag að fá fregnir af því hvar fjölskyldan væri niðurkomin og hringdi meðal annars þýska ríkislögreglustjóraembættiðí þeim tilgangi. Þar var henni hinsvegar tjáð að það væri ekkert á skrá um að komið hefði verið með albanska ríkisborgara til landsins. Líkt og fram hefur komið millilenti fjölskyldan í Berlín í gær, áður en þau héldu ferðinni áfram til Vínarborgar í Austurríki og þaðan til Albaníu, en ferðalagið tók nítján klukkustundir.

Stundin greindi frá því í gær að þýskir lögreglumenn hefðu tekið á móti fjölskyldunni í Berlín. Sjónarvottur lýsti því hvernig íslenskir lögreglumenn fylgdu fjölskyldunni um borð í vélina á Leifstöð á undan öðrum farþegum. Þá fylgdu þeir þeim til móts við þýska lögreglumenn sem tóku á móti þeim í Berlín.

„Ég tékkaði mig bara inn eins og venjulegur maður og þegar kom að því að fara inn í vélina þá sá ég að það var einhver seinkun. Allt í einu birtast lögreglumenn með tvo fullorðna einstaklinga og eitt barn á milli sín og fara fram fyrir röðina og beint inn í vél. Ég pældi einhvern veginn ekkert í þessu og vissi í rauninni ekkert hvað væri að gerast, en tók náttúrulega eftir þessu eins og aðrir,“ sagði farþeginn sem áttaði sig síðar á því að um væri að ræða fólkið sem fjallað hefur verið um í fréttum.

Útlendingastofnun hefur staðhæft að konan hafi verið ferðafær, samkvæmt vottorði frá lækni á heilsugæslunni á höfuðborgarsvæðinu. Í vottorði læknis á kvennadeild Landspítalans kemur hinsvegar fram að konan sé „slæm af stoðkerfisverkjum í baki og ætti erfitt með langt flug.“

Fylgdust með atburðarrásinni

No Borders samtökin hafa fylgt málinu eftir frá upphafi og flutt fregnir af atburðarrásinni. Elínborg Harpa Önundardóttir, meðlimur samtakanna, fór upp á spítala þegar hún fékk fregnir af því sem væri að gerast. Þegar hún kom á vettvang þá var lögreglan nýfarin, en henni tjáð að lögregluljósin hefðu blikkað lengi vel fyrir utan gluggan á meðan verið var að skoða konuna. „Starfsmönnunum og konunni fannst þetta mjög óhuggulegt og lýstu yfir óþægindum varðandi þetta, að það væri beðið svona fyrir utan gluggann á meðan hún væri þarna með bumbuna úti og mælitækin á sér,“ segir Elínborg Harpa í samtali við Stundina.

Vottorðið veitti vonKatrín Alda Ámundadóttir, meðlimur No Borders, hefur fylgst náið með atburðarásinni.

Elínborg segist hafa verið vongóð um að brottvísun yrði frestað, eftir að þau voru komin með vottorð í hendurnar þar sem fram kom að konan gæti átt erfitt með langt flug. „Þrátt fyrir að hafi séð Útlendingastofnun og stoðdeild lögreglunnar gera allskonar hluti, sem geta einhvernveginn ekki átt að vera hluti af verklaginu þeirra, þá einhvern veginn svona trúði ég þí samt að þetta gæti breytt einhverju.“

Katrín Alda Ámundadóttir, annar meðlimur No Borders, sem fylgdist náið með atburðarrásinni, tekur undir með Elínborgu um að vottorðið hafi veitt ákveðna von. „Sérstaklega í ljósi þess að hún hafði ekki séð neinn annan lækni í einhvern tíma og því hefði enginn annar getað gefið út „fit to fly“ vottorð,“ segir Katrín Alda í samtali við Stundina. Annað hafi hinsvegar komið á daginn þegar í ljós kom að lögreglan hafi fengið annað vottorð frá lækni sem konan hafði ekki verið í sambandi við.

Hún segir aðgerðir lögreglunnar því miður ekki koma henni eða félögum þeirra svo mikið á óvart. „Hreint út sagt þá kom það mörgum okkar ekkert sérlega á óvart þar sem við höfum horft upp á ýmislegt sem lögreglan gerir á vegum Útlendingastofnunnar. Þetta var hins vegar mjög gróft dæmi um þessa valdnýðslu sem á sér oft stað.“

Sem fyrr segir þá er konan nú talsvert verkjuð og á leiðinni á spítala í Albaníu.