Séu ósannindi endurtekin nógu oft geta þau orðið að sannleika í huga fólks. Þetta segir Einar Sveinbjörnsson veðurfræðingur sem bendir á að þeir sem afneiti því að loftslagsbreytingar séu tilkomnar af mannavöldum noti sálfræði af þessum toga. Afneitunarsinnar hamri á því að fréttir af loftslagsbreytingum af mannvöldum séu reknar áfram af sósíalistum og kommúnistum sem vilji umbylta heimsviðskiptakerfinu. Þetta sé hins vegar þvæla.

Einar birti Facebook-færslu þar sem hann rekur hvernig einfaldur misskilningur um það hvar þing Norðurlandaráðs ætti að fara fram, og endurteknar fullyrðingar þar um, undu þannig upp á sig að hann fór að efast um það sem hann taldi sig þó vita að væri rétt. Í þessu tilviki hefði misskilningurinn verið saklaus en það væri þá ekki alltaf reyndin.

„Sé þessi della endurtekin nógu oft munu á endanum margir gangast inn á boðskapinn“

Vísaði Einar til erlends pistils sem þýddur hafði verið og birtur á vefsíðunni Viljanum, grein eftir Joel Kotkin sem kallist Loftslags Stalínisminn. „Þar er enn eina ferðina verið að stilla loftslagsmálunum þannig að þau séu eitthvert einkamál vinstri róttæklinga sem vilja með þeim ná fram langþráðri byltingu á skipulagi heimsins. Sé þessi della endurtekin nógu oft munu á endanum margir gangast inn á boðskapinn,“ skrifaði Einar.

Loftslagsbreytingar eru staðreynd

Í samtali við Stundina segist Einar ekki vilja fullyrða hvort þeir sem endurómi pistla af þessu tagi séu þar með að ganga erinda afneitunarsinna í loftslagsmálum eða hvort þeir séu nytsamir sakleysingjar. „Það er margt reynt í þessari loftslagsumræðu af hálfu afneitunarsinna. Tilgangur þeirra er mjög ólíkur. Það er mjög algengt hjá afneitunarsinnum að hamra á því að fréttir um loftslagsbreytingar, loftslagsáróður eins og afneitunarsinnar kalla þær gjarnan, séu eitthvað áhugamál sósíalista og kommúnista til að umbylta ríkjandi skipulagi í heimsviðskiptum. Ef þessi þvæla er endurtekin nógu oft þá fara menn að trúa þessu og það er hættulegt. Þetta er hins vegar bara kjaftæði. Ég sjálfur kæri mig til að mynda ekkert um að vera settur í hóp með vinstri sósíalistum en ég veit hins vegar að lofslagsbreytingar eru staðreynd. Vísindin þar að baki eru skotheld. Þeir sem reyna að draga úr því eru að ganga annarlegra erinda.“