Atkvæðagreiðslu um þriðja orkupakkann lauk rétt í þessu á Alþingi og var málið samþykkt með 46 atkvæðum gegn 13. Katrín Jakobsdóttir forsætisráðherra beindi orðum sínum að andstæðingum málsins þegar hún gerði grein fyrir atkvæði sínu og kaus með innleiðingu orkupakkans. Hvatti hún þingmenn Miðflokksins og aðra sem kusu gegn málinu til að styðja auðlindaákvæði í stjórnarskrá.

„Þetta mál hefur hér verið í undirbúningi á vettvangi Alþingis frá árinu 2010 með ólíkar ríkisstjórnir og ólíka flokka,“ sagði Katrín. „Þingmenn allra flokka skrifuðu undir nefndarálit á sínum tíma um þetta mál. Ég tel það vel undirbúið, löngu fullreifað og fullrætt hér á vettvangi Alþingis og vel undirbúið af hálfu stjórnvalda sem hafa sett skýra fyrirvara. Og hér á eftir verður sömuleiðis afgreidd skýr ferill um það hvernig beri að meðhöndla tillögu um lagningu sæstrengs ef til hennar kemur.“

Sagðist hún þar af leiðandi styðja málið. „En ég nýti tækifærið hér og heiti á þá þingmenn sem lýst hafa áhyggjum af ýmsum málum í tengslum við afgreiðslu þessa máls að standa þá saman um að tryggja hér ákvæði um þjóðareign á auðlindum í stjórnarskrá,“ bætti hún við. „Að tryggja að staðinn verði vörður um opinbert eignarhald mikilvægra orkufyrirtækja. Að standa að því að setja skýrari lagaramma um jarða- og landakaup og tryggja það að Alþingi búi vel um orku- og auðlindamál eins og við höfum heyrt af frá almenningi í landinu, en þau einfaldlega varða ekki þetta mál og þess vegna styð ég það.“