Kvartanir hafa borist vegna framgöngu lögreglu á tónlistarhátíðinni Secret Solstice og Hinsegin dögum. Dóra Björt Guðjónsdóttir, oddviti Pírata í Reykjavík, hefur óskað eftir komu Sigríðar Bjarkar Guðjónsdóttur, lögreglustjóra Reykjavíkur, á fund mannréttinda-, nýsköpunar- og lýðræðisráðs Reykjavíkurborgar á morgun.

„Fjallað hefur verið um handtöku konu á Hinsegin dögum vegna gruns um mótmæli,“ segir í tilkynningu frá Pírötum. „Í kjölfar Secret Solstice hátíðarinnar er nokkur fjöldi mála í bótakröfuferli sökum kvartana um að lögregla hafi leitað á gestum án dómsúrskurðar.“

Segir í tilkynningunni að ráðið fari með eftirlit með því að mannréttindi og borgaraleg og lýðræðisleg réttindi borgarbúa séu virt þvert á stjórnsýslu Reykjavíkurborgar og á viðburðum með aðkomu Reykjavíkurborgar. Því verði þessum málum fylgt eftir með því að fá kynningu lögreglu og koma ábendingum á framfæri.

„Virðing fyrir borgararéttindum er hornsteinn lýðræðisins,“ er haft eftir Dóru Björt. „Lögreglan hefur einkarétt á beitingu valds gagnvart þegnum okkar lýðræðissamfélags og gríðarlega mikilvægt er að vel sé farið með það vald til að halda trausti borgarbúa á löggæslukerfinu og réttarríkinu sem slíku.“