Davíð Oddsson, ritstjóri Morgunblaðsins og fyrrverandi forsætisráðherra, var með rúmar 5,3 milljónir króna á mánuði í laun árið 2018, en hluti þeirra eru eftirlaun frá tíma hans sem ráðherra og þingmaður. Eftirlaun Davíðs eru 80% af launum forsætisráðherra, en hann fær einnig eftirlaun vegna starfa sinna sem seðlabankastjóri eftir að hann hætti á þingi.

Laun Katrínar Jakobsdóttur, núverandi forsætisráðherra, nema 2.021.825 krónum á mánuði, að meðtöldu þingfararkaupi. Eftirlaunalögin svokölluðu voru umdeild þegar þau voru samþykkt árið 2003 þegar Davíð var forsætisráðherra. Þau voru afnumin árið 2009 í tíð stjórnar Jóhönnu Sigurðardóttur, en gilda engu að síður um Davíð. Lögin náðu til forseta, ráðherra, þingmanna og hæstaréttardómara og varð þeim heimilt að fara á eftirlaun við 55 ára aldur ef þeir höfðu langa starfsreynslu. Þá gátu eftirlaunaþegar þegið launin allt að fjögur ár aftur í tímann, ef þeir kusu að þiggja þau ekki þegar þeir öðlust rétt til þeirra. Voru eftirlaun þaulsetinna forsætisráðherra sérstaklega hækkuð umfram aðra ráðherra.

Frumvarpið var flutt af meðlimum úr öllum þingflokkum Alþingis árið 2003. Að umræðum loknum voru lögin samþykkt með öllum atkvæðum þingmanna Sjálfstæðisflokksins og Framsóknar, þáverandi stjórnarflokka, auk eins atkvæðis úr röðum Samfylkingarinnar. Aðrir flokkar féllu frá stuðningi við frumvarpið.

Heildarlaun og þóknanir til stjórnenda Morgunblaðins, ritstjóranna Davíðs og Haraldar Johannessen, námu kr. 111.088.897 árið 2017, en ekki liggja fyrir upplýsingar úr ársreikningi vegna 2018. Eyþór Arnalds, oddviti Sjálfstæðisflokksins í Reykjavík, er stærsti hluthafi Morgunblaðsins. 

Þórs­mörk ehf, eign­ar­halds­fé­lagið sem á Morgunblaðið og útgáfufélag þess, Árvakur, tapaði 414 millj­ónum króna á árinu 2018, og hefur tapið á útgáfufélaginu numið um 2,2 milljörðum króna síðasta áratuginn.