Björgólfur Guðmundsson, fyrrverandi stjórnarformaður og eigandi Landsbankans, segist þurfa að skoða betur ákæru gegn sér fyrir áfrýjunardómstólnum í París áður en hann veitir fjölmiðlum svör. Saksóknarar lögðu fram skýrslu sína á föstudag.

Málið varðar lánveitingar Landsbankans í Lúxemborg til eldri borgara rétt fyrir hrun, sem kallað er Ponzi-svindl í gögnum ákæruvaldsins, sem Stundin hefur undir höndum. Saksóknarar fara fram á fimm ára fangelsisdóm yfir Björgólfi, hámarksrefsingu samkvæmt frönskum lögum, og 375.000 evra sekt, eða andvirði 52 milljóna króna. Er hann sagður höfuðpaurinn í málinu.

„Ég ætla að fá að hugsa þetta, ég er ekki farinn að skoða þetta sjálfur,“ segir Björgólfur í samtali við Stundina. „Ég bara vissi ekki að þetta væri komið. Ég skoða málið.“

„Ég bara vissi ekki að þetta væri komið“

Landsbankinn í Lúxemborg veitti lán til lífeyrisþega skömmu fyrir hrun, svokölluð „equity release“ lán, en lánþegar telja lánveitingarnar hafa verið eina stóra svikamyllu. Lánin voru veitt gegn veðum í fasteignum þeirra, en þeir fengu aðeins hluta lánsfjár greiddan út. Restin var sett í fjárfestingar hjá Landsbankanum í Lúxemborg sem áttu að skila að minnsta kosti nægri ávöxtun til að greiða vaxtakostnaðinn af láninu. Saksóknarar telja að eignirnar hafi verið metnar of hátt, lánveitingarnar verið umfram raunverulegt virði þeirra, fjármunirnir hafi verið notaðir í annað en lofað var og stjórnendur bankans hafi gefið rangar upplýsingar um stöðu hans fyrir hrun.

„Eignir lántakenda voru sannarlega gleyptar af stjórn Landsbankans, sem gefur fyrirkomulaginu ásýnd sem minnir á Ponzi-svindl,“ segir í skjölum ákæruvaldsins. „Í þessu máli starfaði bankinn eins og lénskerfi, peningar fjárfesta voru notaðir til þess að ýta undir falskt gjaldþol bankans, sem gat þar með haldið áfram að veita lán, helst í þágu Björgólfs Guðmundssonar og fjölskyldu hans.“