Ásmundur Friðriksson, þingmaður Sjálfstæðisflokksins, segir að það hljóti að vera verulega óþægilegt fyrir fólk sem býr nálægt hælisleitendum á Ásbrú að lesa fréttir af því að hælisleitandi hafi tekið upp á því að safna rafgeymasýru. Nágrannar hælisleitenda hafi „mátt þola nafnlausar hringingar og hótanir á erlendu tungumáli“. Þetta fullyrðir þingmaðurinn á Facebook.

Morgunblaðið sló því upp á forsíðu í gær að hælisleitandi hefði verið staðinn að því að safna sýru. Seinna um daginn birtist svo frétt á Mbl.is þar sem fram kom að Útlend­inga­stofn­un hefði ekki haft áhyggj­ur af athöfnum mannsins og lögregla hefði ekki verið kölluð til með beinum hætti. Haft var eftir yfirlögregluþjóni að hann teldi ólíklegt að hælisleitandinn hefði haft í hyggju að skaða einhvern, enda væru hælisleitendur almennt líklegri til að skaða sjálfa sig en aðra.

Ásmundur Friðriksson deilir fyrri fréttinni um málið og lýsir áhyggjum af athöfnum hælisleitandans. „Ekki dettur mér það til hugar að fallegur og góður ásetningur liggi þar að baki en kann það þó að vera að ég hafi rangt fyrir mér.“ Þá vitnar hann í nýútkomna skýrslu ríkislögreglustjóra þar sem vísað er til hælisleitenda sem hafi villt á sér heimildir. „Þeir hafa sagst vera samkynhneigðir og því verið í bráðri hættu í heimalandi sínu en eru síðar staðnir að því að áreita konur hér á Íslandi. Þá hafi þeir þegið félagslega aðstoð en standa sumir hverjir í milljónatuga peningasendingum frá Íslandi til annarra landa. Hvaða þvæla er það?“ skrifar Ásmundur. „Nú hafa margir stigið fram og bent á hvað sé á seiði. Jafnvel þeir sem sóttu hvað harðast að mér þegar ég varaði við þessari þróun fyrir nokkrum árum sitja nú sömu megin við borðið. Tökum tillit til þess sem lögreglan segir og tökum mark á viðvörunum þeirra og áhyggjum.“