Ný lög gætu takmarkað umferð á svifryksdögum

Frumvarp til nýrra umferð­ar­laga veitir sveit­ar­stjórnum og Vega­gerð­inni heim­ild til að tak­marka fjölda bíla á göt­unum vegna meng­unar.

Andrés Ingi Jónsson, þing­maður Vinstri grænna, vakti athygli á þessu á Twitter í dag í ljósi umræðu um svifryks­mengun. „Ný umferð­ar­lög gætu gefið Reykja­vík­ur­borg mik­il­væg verk­færi til að tak­marka umferð þegar er #grár­dagur,“ skrif­aði Andrés Ingi. „Svona með­fram því að við þurfum að draga úr umferð almennt.“

Strætó bs hefur hvatt til átaks um nýt­ingu vist­vænna sam­gangna með slag­orð­inu „Hvílum bíl­inn á gráum dögum“. Er með því vísað til þeirra daga þar sem kjörað­stæður eru til svifryks­meng­unar vegna bíla­um­ferðar. Svifryk mæld­ist langt yfir heilsu­vernd­ar­mörkum víða um höf­uð­borg­ina í gær og hvatti Reykja­vík­ur­borg almenn­ing til að halda börnum inni og draga úr notkun einka­bíls­ins af heilsu­vernd­ar­á­stæðum.

Samkvæmt frum­varpi Sigurðar Inga Jóhanns­sonar sam­göngu- og sveit­ar­stjórn­ar­ráð­herra til nýrra umferð­ar­laga verður sveit­ar­stjórnum og Vega­gerð­inni heim­ilt að tak­marka eða banna umferð um stund­ar­sakir.

„Tak­mark­anir á umferð vegna meng­unar frá öku­tækjum geta t.d. falist í breyt­ingum á hámarks­hraða, tak­mörkun á umferð stærri öku­tækja eða tak­mörkun almennrar umferðar með því að heim­ila til­teknum bif­reiðum akstur á ákveðnum svæðum eftir odda­tölu/jafnri enda­tölu eða sam­bæri­legum enda­bók­staf skrán­ing­ar­merkja,“ segir í frum­varp­inu.

Frum­varpið fór til umhverfis- og sam­göngu­nefndar Alþingis eftir fyrstu umræðu í októ­ber og var síð­ast til umfjöll­unar á fundi nefnd­ar­innar 21. febr­úar.

Svifryks­mengun fer helst yfir heilsu­vernd­ar­mörk þá daga sem loft er þurrt og stillt, einkum kalda vetr­ar­daga. Þá getur meng­unin safn­ast upp þar sem lítil hreyf­ing er á loft­inu. Mengunin er mest við stórar umferð­ar­æðar og nálægt verk­smiðjum, en mæli­stöðvar eru einmitt stað­settar meðal ann­ars við Hring­braut og Grens­ás­veg. Svifryks­mengun hefur einnig reglu­lega mælst umfram mörk á Akureyri.