Snæbjörn Brynjarsson rithöfundur og blaðamaður hefur ákveðið að segja af varaþingmennsku eftir að hafa misst stjórn á skapi sínu og úthúðað Ernu Ýr Öldudóttur blaðamanni. Atkvikið átti sér stað á skemmtistað í Reykjavík aðfararnótt síðastliðins laugardags.

Í færslu á Facebook síðu sinni segir Snæbjörn að hegðun hans hafi verið með öllu óviðeigandi og ekki sæmandi kjörnum fulltrúa. Í samtali við Stundina staðfestir Snæbjörn að hann hafi lýst skoðun sinni á störfum og persónu Ernu með orðfæri sem sé óboðlegt, án þess að vilja fara í frekari útleggingar á því sem þar kom fram. Hann og Ernu greini á um hvað hafi verið sagt en Erna lýsti því í samtali við Fréttablaðið að Snæbjörn hefði hótað að berja hana. Snæbjörn segir það ekki rétt en hann hafi hins vegar sagst fyrirlíta hana fyrir að vinna hjá Birni Inga Hrafnsyni en hann rekur fréttamiðilinn Viljann þar sem Erna vinnur.

„Af virðingu fyrir því umboði sem allt þetta fólk veitti mér hef ég ákveðið að segja af mér tafarlaust sem varaþingmaður Pírata“

„Í ljósi atburða liðinnar helgar hef ég því ákveðið að segja af mér sem varaþingmaður Pírata, frekar en að láta þessa hegðun kasta rýrð á samstarfsfélaga mína og Alþingi. Mér er annt um virðingu Alþingis, traust fólks á kjörnum fulltrúum, en sér í lagi er mér annt um þau þúsundir manna sem kusu Pírata og öll þau hundruð sem lögðu á sig þrotlausa sjálfboðavinnu til að tryggja mér kjör. Af virðingu fyrir því umboði sem allt þetta fólk veitti mér hef ég ákveðið að segja af mér tafarlaust sem varaþingmaður Pírata fyrir Reykjavíkurkjördæmi suður og víkja úr öllum ábyrgðarstöðum sem Píratar hafa falið mér,“ skrifar Snæbjörn og biðst jafnframt afsökunar á hegðun sinni.