Kristín Soffía Jónsdóttir, borgarfulltrúi Samfylkingarinnar, kvartar undan gagnrýni flokksfélaga sinna á áform borgarinnar um að gróðursetja tvö pálmatré í nýju íbúðahverfi austan Sæbrautar. Kostnaðurinn við listaverkið og framkvæmdirnar er alls 133 milljónir króna en þar af kosta pálmatrén vel á aðra milljón og gróðurhúsin 85,5 milljónir. 

Málið hefur vakið nokkra athygli undanfarna daga en Hjálmar Sveinsson, borgarfulltrúi og formaður dómnefndarinnar sem valdi listaverkið, hefur sagt að pálmatrén verði „segull og kennileiti fyrir þetta hverfi“. Áformin hafa hlotið harða gagnrýni á lokuðu spjalli Samfylkingarfólks á Facebook þar sem Kristín Soffía finnur sig knúna til að bregðast við. 

„Ég verð að viðurkenna að umræðurnar hérna inni eru farnar að særa mig. Mér finnst leiðinlegt að sjá herferð minnihlutans gegn Samfylkingunni og Degi sérstaklega vera að ná rótum hér,“ skrifar hún og bendir á að hvergi á landinu hafi Samfylkingin náð eins viðvarandi árangri og í Reykjavík.

„Í Reykjavík er rekið jafnaðarsamfélag og það er Samfylkingunni að þakka. Hér eru lægstu álögur á börn og barnafólk, mest framboð af félagslegu húsnæði og sértækum búsetuúrræðum. Við veitum hæstu fjárhagsaðstoðina og hæstu sérstöku húsaleigubæturnar. Við erum eina sveitarfélagið og bara eini aðilinn sem sinnir málefnum heimilislausra og jaðarsettra og í ár er sett fordæmalaust mikið fjármagn í málaflokkinn.“

Hún segir flokksmenn geta verið stolta af árangrinum. Þá víkur hún að pálmatrjáalistaverkinu í Vogabyggð og bendir á að innheimt hafi verið innviðagjöld og aðeins litlum hluta þeirra verði varið til listar í almannarými. Þar hafi pálmatrjáaverkið unnið alþjóðlega samkeppni. „Áður en þið hoppið á þann vagn að kalla okkur byrði, vitleysinga, hálfvita, annað verra sem hefur fallið hérna inni þá skuluð þið endilega spá í það hvort það sé virkilega það sem við sem störfum fyrir Samfylkinguna í Reykjavík eigum skilið.“ 

Þá bætir Kristín Soffía við: „Já við viljum list í öll hverfi, nei við viljum ekki byggja upp fátækrahverfi. Kostnaðurinn verður sirka 0,2% af íbúðaverði. Já þetta verður frábært. Nei þetta er ekki stóra málið í stóra samhenginu en þetta er samt mikilvægt. Og nei þetta er ekki vanhugsað heldur er þetta útpælt. Við þurfum ykkar stuðning, mér finnst við eiga hann skilið því við erum jafnaðarmenn og höfum verið leiðandi í að innleiða áherslur jafnaðarmanna í Reykjavík og það sést.“ 

Ein Samfylkingarkonan sem leggur orð í belg segir að Braggamálið hafi vakið mikla óánægju í samfélaginu og þar hafi „stráin“ (höfundarréttarvarin dönsk strá sem kostuðu 757 þúsund krónur) aðeins verið toppurinn á ísjakanum. Nú sé svo komið að hlegið sé að Samfylkingarfólki á vinnustaðnum hennar. Kristín Soffía bregst við með þeim orðum að umræðan meðal Samfylkingarfólks sé síður en svo vinsamleg eða uppbyggileg. „Hér eru gífuryrði og upphrópanir og fyrirgefðu mér en mér finnst vont að við eigum ekki meiri inneign hjá ykkur en svo eftir öll þessi ár.“ 

„Hér eru gífuryrði og upphrópanir og fyrirgefðu mér en mér finnst vont að við eigum ekki meiri inneign hjá ykkur en svo eftir öll þessi ár“

Konan  segist ekki vilja særa neinn en biður þó um að hlustað sé á óánægjuraddir. „Hlusta á hvað? Eru skilaboðin hér sú að við viljum ekki fjárfesta í list? Eða bara öðruvísi list? Eigum við ekki að virða niðurstöður samkeppninnar eða eigum við bara að hafna listsköpun yfir höfuð?“ svarar Kristín Soffía og segir að einungis 0,3 prósentum af innviðagjöldunum hafi verið varið til listsköpunar í nýja íbúðarhverfinu. 

Jónína Rós Guðmundsdóttir, fyrrverandi þingkona Samfylkingarinnar, blandar sér í umræðuna og segist telja að heppilegra hefði verið að „bíða aðeins með að ræða þessi listaverk, við erum aðeins berskjölduð fyrir gagnrýni núna eftir stráin og braggann“. 

„Við erum aðeins berskjölduð fyrir
gagnrýni núna eftir stráin og braggann“

Kristín Soffía segir að vissulega sé „óheppilegt að tré hafi unnið [í hugmyndasamkeppni] eftir vandræðaleg strá“. Hins vegar finnist henni ómaklegt að „slátra“ borgarfulltrúum eftir þann góða árangur sem Samfylkingin hafi náð í rekstri  borgarinnar.

Samfylkingarmaður sem leggur orð í belg telur fráleitt að láta eins og dómnefndin og niðurstaða hennar hafi ekkert með Samfylkinguna að gera. „Hjálmar var beinlínis formaður nefndarinnar (það eitt og sér orkar jafnvel tvímælis). Hvað er langt þangað til DV eða eitthvað annað blað fer og kemst að því hvað hann var með á tímann fyrir að starfa í þessari dómnefnd? Er það stóra málið? Nei. Mun það hafa slæm áhrif á Samfylkinguna? Já.“ 

„Hvað er langt þangað til DV eða eitthvað annað blað fer og kemst að því hvað hann var með á tímann fyrir að starfa í þessari dómnefnd?“

Ein þeirra sem taka þátt í umræðunum veltir því upp hvort Samfylkingin þurfi ef til vill að beita „dýpri PR tækni við upplýsingagjöf – án þess að vera að spinna“ og beinir þeim skilaboðum til Péturs Ólafssonar, aðstoðarmanns borgarstjóra og Karenar Kjartansdóttur, framkvæmdastjóra þingflokks.

Í tilkynningu frá Reykjavíkurborg sem barst fjölmiðlum dag kemur fram að samkvæmt áætlunum muni  Reykjavíkurborg fá tæpa sex milljarða í byggingarréttar- og gatnagerðargjöld vegna uppbyggingar í Vogabyggð, hinu nýja íbúðahverfi. „Verða þær tekjur notaðar til að fjármagna alla innviði hverfisins eins og götur, lagnir, torg, lýsingu, gróður, skóla, leikskóla – og listaverk sem lóðarhafar greiða að jöfnum hluta á móti Reykjavíkurborg samkvæmt samningum.“ 

Bent er á að í samþykktum samningsmarkmiðum borgarinnar á nýbyggingarsvæðum sé ákvæði um að list í almenningsrýmum skuli fjármögnuð af lóðarhöfum. Er samið við hvern og einn lóðarhafa hversu hátt hlutfall þeir greiði til slíkra verka, aldrei minna en 50% og er fjármagnið eyrnamerkt listaverkum á svæðinu. Í því samhengi var Listasafni Reykjavíkur falið að halda alþjóðlega samkeppni um listaverk í Vogabyggð.