Þingmenn fóru hörðum orðum um máls­höfðun fjög­urra þing­manna Mið­flokks­ins gegn Báru Hall­dórs­dóttur, upp­ljóstr­ara í Klaust­urs­mál­inu, undir liðnum störf þings­ins á Alþingi í dag.

„Mér blöskrar þetta fram­ferði,“ sagði Snæbjörn Brynjars­son, vara­þing­maður Pírata. „Mér blöskrar að fólk sem er með marg­faldar tekjur á við þennan ein­stak­ling hóp­ist saman gegn þess­ari einu mann­eskju og krefj­ist refs­ingar. Þessir menn hafa sýnt að þeir hafi hvorki mann­dóm né kjark til að biðj­ast afsök­unar á hegðun sinni eða segja af sér.“

Þingmenn Mið­flokks­ins, þau Gunnar Bragi Sveins­son, Sig­mundur Davíð Gunn­laugs­son, Bergþór Ólason og Anna Kolbrún Árna­dóttir, vilja að Bára, 42 ára öryrki, sæti refs­ingu og greiði þeim miska­bætur vegna „njósn­a­að­gerðar“ á Klaustri Bar þann 20. nóv­em­ber síð­ast­lið­inn. 

Snæbjörn sagði það ótrú­legt að hugsa til þess að þeim hafi dottið mál­sókn í hug. „Þeir ættu frekar að þakka henni fyrir að hafa kennt sér mik­il­væga lífs­lexíu.“ Heyrðust þá þing­menn hrópa „heyr, heyr“.

Segir þingmennina beina athyglinni annað

Bjarkey Olsen Gunn­ars­dóttir, þing­maður Vinstri grænna, tók í sama streng. „Við erum að tala um atvik þar sem for­seti Alþingis þurfti að biðja bæði þing og þjóð afsök­unar,“ sagði hún. „Í mínum huga lýsir þetta algjöru skiln­ings­leysi á alvar­leika máls­ins og á þeirri stöðu sem þessir fjór­menn­ingar hafa komið sér í.“

Lýsti hún skömm og furðu á mál­inu. „Að mínu mati er þetta enn og aftur til­raun til þess að drepa mál­inu á dreif, beina athygl­inni annað og reyna um leið að kom­ast hjá því að axla ábyrgð á eigin orðum og gjörðum og það er þessum þing­mönnum hreint ekki til sóma,“ sagði Bjarkey.