Framsóknarflokkurinn hafnaði alfarið að sett yrðu upp tollhlið á núverandi þjóðvegum landsins í ályktun á síðasta flokksþingi flokksins sem fór fram í mars síðastliðnum. Hið sama gerðu Vinstri græn en flokkurinn hafnaði álagningu veggjalda í ályktun á síðasta landsfundi flokksins, sem fór fram í október 2017. Meirihluti umhverfis- og samgöngunefndar Alþingis hyggst nú leggja fram breytingartillögu við samgönguáætlun sem inniber að veggjöld verði tekin upp um allt landi. Meirihlutann skipa þingmenn bæði úr Framsóknarflokki og Vinstri grænum, auk þess sem tillagan er unnin í nánu samráði við samgönguráðherra, Sigurð Inga Jóhannsson, formann Framsóknarflokksins.
Hafna gjaldtöku
Í málefnaályktun flokksþings Framsóknarmanna um samgöngumál kemur fram að útfæra þurfi nýjar tekjuleiðir sem endurspegli afnot af þjóðvegakerfinu og að eldsneytisskattar myndi áfram tekjugrunn samgangna á landi, og/eða að aksturstengd gjöld leysi þá af hólmi. Svo segir: „Framsóknarflokkurinn hafnar tollhliðum á núverandi þjóðvegum.“
Í landsfundarályktun Vinstri grænna um samgöngumáli frá því í október á síðasta ári segir að Vinstri græn telji að vegakerfið skuli byggt upp og viðhaldið úr sameiginlegum sjóðum og „hafna hugmyndum um uppbyggingu grunnvegakerfis byggðri á vegatollum.“
Í ályktuninni segir einnig að Vinstri græn „telja áherslur fráfarandi ríkisstjórnar í samgöngumálum forkastanlegar.“ Sú ríkisstjórn sem um ræðir var ríkisstjórn Sjálfstæðisflokks, Viðreisnar og Bjartrar framtíðar. Jón Gunnarsson sat þá sem samgönguráðherra og talaði af þunga fyrir því að tekið yrði á vanda vegakerfisins með því að taka upp veggjöld, einkum á leiðum til og frá höfuðborgarsvæðinu. Þannig skipaði Jón starfshóp sem meta skyldi leiðir til uppbyggingar vegakerfisins. Sá starfshópur skilaði niðurstöðu í september á síðasta ári þar sem lagt var til að tekin yrðu upp veggjöld til að fjármagna uppbyggingu þriggja helstu þjóðvega landsins.
„Framsóknarflokkurinn hafnar tollhliðum á núverandi þjóðvegum“
Ríkisstjórn flokkanna þriggja sprakk hins vegar vegna þess trúnaðarbrests sem Björt framtíð upplifði vegna upreistar æru málsins svokallaða. Að afloknum kosningum var mynduð ríkisstjórn Vinstri grænna, Framsóknarflokks og Sjálfstæðisflokks undir forsæti Katrínar Jakobsdóttur. Þar settist Sigurður Ingi sem fyrr segir í stól samgönguráðherra en Jón Gunnarsson átti sæti í umhverfis- og samgöngunefnd.
Eftir að Klausturmálið kom upp á dögunum tók Jón við sem formaður nefndarinnar eftir að Bergþór Ólason, þingmaður Miðflokksins, vék af þingi. Skömmu síðar var greint frá því að meirihluti nefndarinnar myndi leggja fram breytingartillögu við samgönguáætlun sem innibæri að teknir yrðu upp vegtollar á öllum stofnbrautum út frá Reykjavík og í öllum jarðgöngun landsins. Í umhverfis- og samgöngunefnd eiga sæti Líneik Anna Sævarsdóttir úr Framsóknarflokki og Ari Trausti Guðmundsson og Rósa Björk Brynjólfsdóttir úr Vinstri grænum.
Athugasemdir