Raddir Lífar Magneudóttur borgarfulltrúa Vinstri grænna og Gunnlaugs Braga Björnssonar varaborgarfulltrúa Viðreisnar heyrast í nokkrar mínútur á síðustu Klaustursupptökunni sem Stundin hefur undir höndum. 

Björn Ingi Hrafnsson, fyrrverandi aðaleigandi DV og Pressunnar, greindi frá því á vef sínum Viljanum.is í gær að „stjórnmálamennirnir sem sátu á Klaustur [hefðu verið] átta en ekki sex“. Sagði hann að Líf og Gunnlaugur hefðu setið „drykklanga stund“ með Miðflokksmönnum á Klaustri bar.

Líf og Gunnlaugur brugðust við á Facebook og sögðust hafa litið við á Klaustri þetta kvöld til að fá sér einn drykk; Sigmundur Davíð hefði boðið þeim yfir á þingmannaborðið, þau kastað kveðju á karlana en látið sig hverfa skömmu síðar.

Sex þingmanna hittingur

Hljóðupptökurnar af Klaustri sem Stundin hefur undir höndum eru 3 klukkustundir og 41 mínúta á lengd. Þar af taka um 3 klukkustundir og 38 mínútur einvörðungu til samtala sex þingmanna, þeirra Sigmundar Davíðs Gunnlaugssonar, Gunnars Braga Sveinssonar,  Önnu Kolbrúnar Árnadóttur, Bergþórs Ólasonar, Ólafs Ísleifssonar og Karls Gauta Hjaltasonar. 

Á síðustu upptökunni má heyra fleiri raddir í fjarska, meðal annars kvenmannsrödd. Þegar tvær mínútur eru eftir af upptökunni má greina að konan segir: „Jæja, hefst þá ekki bara innrás kommúnismans og frjálshyggjunnar.“ Nú liggur fyrir að þetta var Líf, oddviti Vinstri grænna í borginni, en með henni í för var Gunnlaugur varaborgarfulltrúi markaðshyggjuflokksins Viðreisnar. 

Líf og Gunnlaugur heyrast tala saman sín á milli í lágum hljóðum. Orðaskil þeirra eru illgreinanleg enda tala Miðflokksmenn talsvert hærra en þau og virðast afar ölvaðir þegar hér er komið sögu.

„Við þáðum boðið [að setjast við borðið] en áttuðum okkur fljótt á því að félagarnir væru ofurölvi og varla samræðuhæfir,“ skrifar Líf á Facebook. „Við köstuðum því á þá kveðju og héldum heim á leið grunlaus um allt það sem hafði farið fram fyrr um kvöldið.“ 

Tók ekki eftir Líf

Hér sat Bára og tók samskipti þingmannanna upp eins og frægt er orðið.

Mynd: Heiða Helgadóttir

Bára Halldórsdóttir , sem sat skammt frá og tók samskipti þingmannanna upp, fór út af Klaustri bar að því er virðist skömmu eftir að Líf og Gunnlaugur komu inn. Bára kom af fjöllum þegar Stundin bar undir hana grein Björns Inga og sagðist ekki hafa tekið eftir Líf Magneudóttur.

Aðspurð um málið segir Líf að það sé þvættingur að þau Gunnlaugur hafi setið „drykklanga stund“ með Gunnari Braga, Sigmundi og Bergþóri. Í mesta lagi hafi þau setið í fáeinar mínútur á borðinu. Er þetta í samræmi við frásögn Gunnlaugs Braga. „Ég einfaldlega fordæmi orð og mannhatur þingmannanna sex. Þessari aumkunarverðu tilraun Björns Inga og félaga til að draga okkur Líf inn í þetta ömurlega mál vísa ég einfaldlega beinustu leið til föðurhúsanna,“ skrifar Gunnlaugur á Facebook.

Björn Ingi segir í greininni á vef Viljans: „Upptökur þær af samtali stjórnmálamannanna, sem senda voru þremur fjölmiðlum í síðustu viku, ná ekkert til samræðnanna þegar þau Líf og Gunnlaugur voru sest við borðið. Að minnsta kosti hefur ekkert birst af þeim í þeim fjölmiðlum; DV, Stundinni og Kvennablaðinu sem fengu þær sendar frá heimildarmanni sem kallaði sig Marvin.“

Björn Ingi hefur komið víða við í stjórnmálum og viðskiptum. Eftir að hafa yfirtekið fjölda fjölmiðla á síðustu árum riðaði Pressuveldi hans til falls, en var bjargað með fjármagni frá óþekktum aðila. Þá stofnaði Björn Ingi Samvinnuflokkinn fyrir síðustu alþingiskosningar, en hann rann inn í Miðflokk Sigmundar Davíðs Gunnlaugssonar. Viljinn.is er nýr vefmiðill Björns Inga.

Sem áður segir koma raddir Lífar og Gunnlaugs fyrir í nokkrar mínútur á umræddum upptökum en ekkert af því sem þau heyrast segja hefur verið metið fréttnæmt.