Sigmundur Davíð Gunnlaugsson, formaður Miðflokksins, hringdi í Freyju Haraldsdóttur síðdegis í dag og kvað hana misskilja að hæðst hefði verið að henni á fundi hans með fimm öðrum þingmönnum Miðflokksins og Flokks fólksins. Þetta kemur fram í frásögn Freyju á Kjarnanum í kvöld.

Í samtalinu, sem tekið var upp, heyrist að Sigmundur Davíð segir tvo menn við borðið hafa sérstakan áhuga á tveimur konum. Önnur þeirra sé Freyja Haraldsdóttir. Þegar nafn hennar kemur fram heyrist skært hljóð sem líkist hljóði í sel, og segir Anna Kolbrún Árnadóttir, ítrekað orðið „eyja“, þegar nafn Freyju kemur fram.

„Díses kræst maður,“ segir Karl Gauti Hjaltason, þingmaður Flokks fólksins, eftir að konurnar tvær eru nefndar. „Þetta eru konur sem sameina þessa tvo menn,“ segir Sigmundur þá. 

Sigmundur Davíð GunnlaugssonFyrrverandi forsætisráðherra sagði tvo menn við borðið á Klaustri hafa sérstakan áhuga á Freyju Haraldsdóttur, sem uppnefnd var Freyja „eyja“.

Mynd: Pressphotos

En í símtalinu við Freyju sagði Sigmundur þetta allt misskilning. Hann segir að „eyja“ sé tilvísun í vegg í húsnæði Miðflokksins, sem hafi verið fjarlægður til að bæta aðgengi fatlaðra. Því hafi verið um að ræða jákvætt samhengi, þar sem það tengdist aðgengisumbótum.

„Hann útskýrði að sela­hljóðin hefðu lík­lega verið stóll að hreyfast og að upp­nefnið Freyja Eyja hefði orðið til­ þegar fjar­lægja þurfti vegg (sem hann kall­aði eyju) af skrif­stofu Mið­flokks­ins vegna aðgeng­is. Vegg­ur­inn hefði þá fengið þetta við­ur­nefni.“

Þá sagði Sigmundur í símtalinu við Freyju, að skoðanir hennar færu einfaldlega mjög í taugarnar á Gunnari Braga Sveinssyni, þingflokksformanni, „og fleirum“.

„Að líkja mér við dýr og upp­nefna mig (og vegg) Freyju Eyju í kjöl­far aðgeng­is­breyt­inga er aug­ljós­lega eins fötl­un­ar­tengt og það getur orð­ið. Að taka mig fyrir með þessum hætti vegna þess að póli­tískar skoð­anir mín­ar, sem byggja á fem­inískum gild­um, hug­mynda­fræði mann­rétt­inda og upp­ræt­ingu ableis­ma, fara í taug­arnar á sumum körlum, ER fötl­un­ar­fyr­ir­litn­ing og kven­fyr­ir­litn­ing. Það er líka hlut­gerv­ing. Ég er ekki bara eins og dýr heldur líka dauður vegg­ur. Það er til þús­und og ein leið til þess að tjá skoð­ana­á­grein­ing önnur en að hæð­ast að lík­ama og útliti kvenna,“ skrifar Freyja á Kjarnanum.

Freyja segir að hún vildi að hún hefði sagt meira við Sigmund en hún gerði í símtalinu. „Ég get varla lýst van­mætti mínum og van­líðan meðan á sím­tal­inu stóð.“ Hún biðst undan frekari útskýringum hans.

„Ég frá­bið mér frek­ari sím­töl þar sem ófatl­aður karl­maður í valda­stöðu talar niður til mín og reynir að útskýra fyrir mér hvað eru fötl­un­ar­for­dómar og hvað ekki. Eina eðli­lega sím­talið í stöð­unni væri að biðj­ast ein­læg­lega afsök­un­ar, án nokk­urra útskýr­inga eða mála­leng­inga, og segj­ast í ljósi gjörða sinna ætla að axla ábyrgð á ofbeld­inu sem við vorum beittar og segja af sér,“ skrifar Freyja í pistli sínum á Kjarnanum.