Meira en tvö þúsund manns hafa boðað komu sína á mótmæli sem skipulögð eru á Austurvelli á morgun vegna nýlegra uppljóstrana úr Klaustursupptökunum. Á Facebook-síðu mótmælanna sem ber yfirskriftina „Klausturs-þingmenn til ábyrgðar * Mótmælum ósiðlegu framferði!“ kemur fram að mótmælin muni hefjast klukkan tvö en nærri því fimm þúsund manns sýna atburðinum áhuga.

„Boðað er til fundar almennings á Austurvelli 1. desember klukkan 14:00 í tilefni af þeim yfirgengilegu fordómum og mannfyrirlitningu sem hópur þingmanna hafði frammi á fundi sínum á Klausturbarnum í Templarasundi. Almenningur á Íslandi lætur ekki bjóða sér svona talsmáta og viðhorf meðal þingmanna eða annarra starfsmanna sinna. Við erum öll jöfn og eigum að njóta sömu réttinda og virðingar,“ segir í yfirlýsingu hópsins sem stendur að viðburðinum.

„Íslendingar fengu ekki fullveldi til að byggja upp samfélag ójafnaðar, þar sem aðeins örfáir karlar, sem …