Þingmenn Miðflokksins og Flokks fólksins hæddust að MeToo umræðunni í hljóðupptöku sem Stundin hefur undir höndum. Gunnar Bragi Sveinsson og Bergþór Ólason sögðust hafa slíkar sögur af Albertínu Friðbjörgu Elíasdóttur, þingmanni Samfylkingarinnar, og sögðu hana hafa áreitt sig hvorn í sínu tilvikinu. Göntuðust viðstaddir með alvarleika slíkra atburða í framhaldinu.
Gunnar Bragi og Bergþór sögðu báðir að Albertína hafi gengið á þá með kynlíf. Bergþór lýsir því að í hans tilviki hafi það gerst á herrakvöldi íþróttafélagsins Vestra en Gunnar Bragi segir sinn atburð hafa átt sér stað í samkomuhúsinu í Hnífsdal.
Þegar Stundin náði tali af Albertínu sagði hún Gunnar Braga hafa hringt í sig, beðist afsökunar og sagt að ekkert af því sem fram hafi komið í samtalinu hafi verið satt.
„Hann gaf mér leyfi til að segja ykkur að hann væri tilbúinn til að bera þetta til baka og bað mig afsökunar,“ segir Albertína í samtali við Stundina. „Það er hrikalegt að vera ásakaður um eitthvað sem gerðist ekki.“
Aðspurð um viðburðina sem mennirnir tala um segist hún ekki kannast við atvikin. „Ég er eiginlega bara kjaftstopp. Mér er rosalega illt í hjartanu yfir öllum þessum samtölum sem þeir áttu þarna. Ég er hreinlega orðlaus. Þetta er bara ekki rétt.“
„Take one for the team“
Sigmundur Davíð Gunnlaugsson, Gunnar Bragi Sveinsson, Bergþór Ólason og Anna Kolbrún Árnadóttir voru á Klaustur bar 20. nóvember síðastliðinn og ræddu við Ólaf og Karl Gauta Hjaltason, þingmenn Flokks fólksins, um að ganga í Miðflokkinn. Orðaskiptin voru mjög hávær, áttu sér stað í vitna viðurvist og náðust að hluta á upptöku.
„Við eigum sem sagt MeToo sögu,“ sagði Bergþór á einum tímapunkti í samtalinu.
„Léstu þig hafa það“ spurði einhver í kjölfarið
„Nei ég gerði það sem betur fer ekki,“ sagði Bergþór.
„Það voru ýmsir sem sögðu ‘take one for the team’ en Beggi var ekki til“ sagði Sigmundur Davíð og uppskar hlátur.
„Ég var orðinn þreyttur á herrakvöldi Vestra,“ sagði Bergþór.
„Hversu hart gekk hún fram?“ var spurt í kjölfarið
„Hún var að tosa buxurnar af hælunum á mér [...] Ég vakna úr nærbuxunum.“
„Hvað, á ég að ríða henni?“
Í framhaldinu deildi Gunnar Bragi sinni sögu. „Það var svipað. Ég var nýlega orðinn ráðherra og þetta var í kringum kosningar, 2009-10 ]…] Það er einhver hátíð í samkomuhúsinu í Hnífsdal. Ég mæti þarna sem frambjóðandi ásamt fleirum. Ég er allt í einu farinn að dansa við þessa stúlku […] Ég sagði bara nei […] en það var bara suðað. Þá var bara eins og einhver hefði verið líflátinn. Hún var brjáluð, hún trylltist, hún grenjaði og öskraði. Ég bara hugsaði, hvað, á ég að ríða henni? Það var algjörlega kreisí.“
Viðstaddir hlógu að lokinni frásögninni.
„Þetta er sú þingkona sem hélt lengstu MeToo ræðuna. Og við sátum bara „what the fuck is going on“,“ bætti Bergþór við.
„Þessir menn munu aldrei ná bata nema þeir opni sig, og það í opnuviðtali.“ sagði Sigmundur Davíð og uppskar hlátur.
„Það getur vel verið að við ákveðnar aðstæður, ég ætla ekki að segja hvað aðstæður, að ég þurfi að labba að henni og segja: Ertu búin að gleyma því þegar þú reyndir að nauðga mér?“ sagði Gunnar Bragi og aftur var hlegið.
„Ég er bara búinn að sirkúlera út þau eintök sem mesta MeToo hættan er af og þetta eintak er á þeim lista.“
„Ég mun segja, ertu búin að gleyma því þegar þú reyndir að nauðga mér í alvöru?“ bætti Bergþór við. „Ég er búinn að sjá það að það er MeToo hætta af hálfu nokkurra einstaklinga. Ég er bara búinn að sirkúlera út þau eintök sem mesta MeToo hættan er af og þetta eintak er á þeim lista.“
Áfengi og DV viðtal til að takast á við svona
Að lokinni frásögn Bergþórs og Gunnars Braga kom afgreiðslukona með drykki og osta á borðið til þingmannanna. „Is this Icelandic cheese“ spurði Gunnar Bragi og þegar svarið reyndist vera neikvætt hrópaði hann „No! Check!“. Í framhaldinu héldu umræðurnar áfram.
Ólafur Ísleifsson: „Þetta er rosaleg lífsreynsla, ha.“
Karl Gauti Hjaltason: „Ég hef aldrei heyrt annað eins.“
Sigmundur Davíð: „Þið sjáið það að þessir menn þurfa stuðning, skilning og stuðning.“
Þá hlógu viðstaddir.
Gunnar Bragi: „Fyrst og fremst áfengi!“
Sigmundur Davíð: „Já ég meina það er oft besta leiðin til að takast á við svona.“
Anna Kolbrún: „Það þarf að opna sig, Bergþór.“
Sigmundur Davíð: „Ef menn vilja vera með í nútímanum þá fara þeir í viðtal á DV.“
Styðja femínisma og jafnréttisbaráttu opinberlega
Sigmundur Davíð og Gunnar Bragi hafa báðir beitt sér í orði fyrir kynjajafnrétti. Árið 2015 var Sigmundur Davíð útnefndur einn fremsti karlfemínisti heims af breska dagblaðinu Financial Times. Hann var sagður kyndilberi HeForShe átaks UN Women og þá vakti ræða hans á leiðtogafundi aðildarríkja Sameinuðu þjóðanna í síðasta mánuði athygli.
„Hún leggst náttúrulega bara mjög vel í mig, ef við leggjum þann skilning í orðið að þetta snúist um jafnrétti," sagði Sigmundur Davíð við Stöð 2 um nafnbótina.
Í tíð sem utanríkisráðherra beitti Gunnar Bragi sér fyrir He for She átakinu um kynjajafnrétti. „Spurningin sem ég legg til hér er nógu einföld: af hverju er íslenskum karlmönnum annt um jafnrétti?“ skrifaði hann í grein í The Guardian, sem leikkonan Emma Watson vakti athygli á á alþjóðavísu. Þá ávarpaði hann allsherjarþing Sameinuðu þjóðanna og fjallaði sérstaklega um verkefnið og jafnréttismál almennt.
300 stjórnmálakonur deildu sögum sínum
Ríflega 300 íslenskar konur úr öllum flokkum sendu í fyrra frá sér áskorun til stjórnmálanna um að taka á kynferðisofbeldi og áreitni af festu, þar sem allir flokkar setji sér viðbragðsreglur og lofi konunum að þær þurfi ekki að þegja meir því þær fái stuðning.
Samhliða því sendu stjórnmálakonurnar níu reynslusögur ónafngreinda kvenna, sem greindu frá áreitni sem þær hafa orðið fyrir. Ein sagði þar frá því að henni hafi verið hótað nauðgun vegna skoðana sinna og önnur sagði það þekkt á alþjóðlegum fundum hvaða stjórnmálamenn séu mestu perrarnir, því þær hafi margar lent í þeim.
Klausturmálið
Vigdís gagnrýnir styrk til Báru vegna „Klausturgate“
Klausturbar skiptir um nafn
Árið 2019: Barátta barnanna og bakslagið í umræðunni
Hatari styrkir Báru uppljóstrara
Illugi Jökulsson
Hvað er á seyði á Alþingi?
Athugasemdir