Veðkall var gert í hlutabréfum Laugavegar ehf., félags Sturlu Sighvatssonar fjárfestis, í leigufélaginu Heimavöllum á dögunum, samkvæmt traustum heimildum ViðskiptaMoggans. Sturla hafi þannig misst yfirráð yfir langstærstum hluta bréfa sinna í félaginu, sem seld hafi verið á 140 milljónir króna.

Stundin fjallað nýlega um Sturlu, sem var einn af stofnendum Heimavalla og fyrsti framkvæmdastjóri félagsins. Samkvæmt nýjustu tilkynningu félagsins til kauphallarinnar í maí var félag hans, Laugavegur ehf., þrettándi stærsti hluthafi Heimavalla, með 2,04% hlut. Nafnvirði bréfa hans námu um 200-250 milljónum króna að mati ViðskiptaMoggans.

Fjöldi fasteigna í eigu félaga Sturlu hefur hins vegar verið boðinn upp til nauðungarsölu undanfarna mánuði. Fasteignafélag hans er ógjaldfært og sum dótturfélög í mjög alvarlegum vanskilum. Sturla hefur verið umfangsmikill í fasteignaviðskiptum og situr í stjórn á þriðja tug félaga, sem flest snúa að fjárfestingum í fasteignum eða sjóðum.

Telja heimildarmenn Viðskiptamoggans að lengi hafi verið vitað af fjárhagsörðugleikum sem tíundaðir voru í frétt Stundarinnar og mögulega hafi gengi Heimavalla tekið kipp eftir að ljóst var að Laugavegur ehf. hyrfi úr hluthafahópnum. Bréf Heimavalla hafi hækkað mikið í kjölfar veðkallsins, en bréfin voru seld af Kviku á lægsta verði sem bréf Heimavalla hafa verið skráð á síðan félagið fór á markað í vor.

Veðkall er þegar fjárfestir þarf að leggja fram auknar tryggingar vegna láns sem liggur til grundvallar skuldsettri fjárfestingu. Lánveitandinn hefur heimild til að þvinga lántakandann til að selja bréf ef hann getur ekki lagað stöðuna með öðrum hætti.

Segist kaupa bréfin aftur

Sturla hafnar því í samtali við ViðskiptaMoggann að um veðkall hafi verið að ræða. Segir hann að hann hafi skipt um banka og hyggist kaupa öll bréfin aftur með framvirkum samningi hjá Arion banka. „Þeir eru að kaupa bréf fyrir mig núna og út þessa viku. Ég mun á endanum eiga sama magn bréfa og ég átti áður, og jafnvel meira. Ég hef mikla trú á Heimavöllum til framtíðar,“ segir Sturla. 

Arion banki er einn af þeim kröfuhöfum sem beðið hafa um nauðungarsölur í fasteignum félaga Sturlu undanfarna mánuði, eins og fram hefur komið í umfjöllun Stundarinnar.