Breytingatillaga meirihluta fjárlaganefndar Alþingis, sem kvað á um að ríkissjóði yrði heimilað að lána Íslandspósti 1,5 milljarða króna, var dregin til baka við aðra umræðu um fjárlagafrumvarp næsta árs á þingi í gærkvöldi. Fyrirtækið hafði þegar fengið vilyrði fyrir láni upp á hálfan millljarð króna og átti að auka við þá upphæð, til að mæta lausafjárvanda þess.

Stundin hefur greint ítarlega frá rekstrarvanda Íslandspósts síðustu vikur. Í hálfsársuppgjöri fyrirtækisins sem birt var í lok sumars kom fram að Íslandspóstur hefði tapað 161,2 milljónum króna á fyrri helmingi þessa árs. Þá væri áætlað að tekjur fyrirtækisins myndu dragast saman um allt að 400 milljónir króna á árinu vegna fækkunnar bréfasendinga.

Í Fréttablaðinu í dag er rætt við Pál Magnússon nefndarmann í fjárlaganefnd sem lýsir því að meirihluti nefndarinnar hafi tekið þá ákvörðun að draga breytingartillögu til baka og skoða málið betur. „Það er til skoð­unar hvort ein­hver frek­ari skil­yrði verði sett fyrir þess­ari heim­ild til lán­veit­ing­ar. Þá kæmi breytt breyt­ing­ar­til­laga inn á milli ann­arrar og þriðju umræðu. Nefndin vildi skoða málið betur og kalla eftir frek­ari skýr­ingum áður en þessi heim­ild yrði veitt.“